Նախագահ Սարգսեանի Հանդիպումը՝Սերպիոյ Ուղղափառ Եկեղեցւոյ Պատրիքարքին Հետ ։
Պաշտօնական այցելութեամբ Սերպիա գտնուող Հայաստանի նախագահ Սերժ Սարգսեան երէկ հանդիպում ունեցաւ Սերպիոյ Իրինէյ Պատրիարքին հետ: Հայաստանի նախագահի մամլոյ գրասենեակը կը տեղեկացնէ, որ հանդիպումին ընթացքին կարեւոր նկատուեցան Հայ Առաքելական Եկեղեցւոյ եւ Սերպ Ուղղափառ եկեղեցւոյ միջեւ ձեւաւորուած ջերմ յարաբերութիւնները:
Նախագահ Սարգսեան յատկանշական նկատեց այն փաստը, որ Քոսովոյի մէջ գտնուող հայկական խաղաղապահ գումարտակը իր լիազօրութիւններուն ծիրին մէջ կատարած է առաւելագոյնը` պաշտպանելով Քոսովոյի մէջ գտնուող Սերպ եկեղեցիները:
Հայաստանի նախագահը հանդիպում ունեցաւ նաեւ Սերպիոյ հայ համայնքի ներկայացուցիչներուն հետ: Ան ծաղիկներ զետեղեց մայրաքաղաքի Ս. Գաբրիէլ Հրեշտակապետ եկեղեցւոյ կից` 1988-ի երկրաշարժի օրերուն Հայաստանի մէջ զոհուած սերպ օդաչուներու յիշատակը յաւերժացնող հայկական Խաչքարին վրայ եւ զրուցեց օդաչուներու հարազատներուն հետ:
«Լեռնային Ղարաբաղի ժողովուրդը, որ Խորհրդային Միութեան փլուզումէն ի վեր օգտուած է իր ինքնորոշման իրաւունքէն, ապագայ չի կրնար ունենալ Ազրպէյճանի կազմին մէջ: Իրեն պարտադրուած դաժան պատերազմին մէջ ան պաշտպանեց իր հայրենիքը եւ անկարելի է Ղարաբաղին ստիպել իր անկախութենէն հրաժարիլ», յայտարարեց նաեւ Հայաստանի նախագահ Սերժ Սարգսեան Սերպիա կատարած այցելութեան ծիրին մէջ , լրատուամիջոցներուն հետ հանդիպման ընթացքին:
Ան փոխանցեց, որ նոյն օրը Սերպիոյ նախագահ Պորիս Թատիչի հետ հանդիպման ընթացքին սերպ իր գործընկերոջ խնդրանքով ներկայացուց Լեռնային Ղարաբաղի տագնապի լուծման ներկայ հանգրուանին մանրամասնութիւնները:
«Մենք համաձայնեցանք, որ խնդիրին խաղաղ լուծումը այլընտրանք չունի եւ ուժի կիրարկումը եւ անոր սպառնալիքը անընդունելի են միջազգային իրաւունքին տեսակէտէն: Պարոն նախագահը նոյն մօտեցումը ցուցաբերեց Քոսովոյի խնդիրին հետ կապուած` ըսելով, որ Սերպիա երբեք չի ճանչնար Քոսովոյի անկախութիւնը, բայց միեւնոյն ժամանակ զերծ պիտի մնայ որեւէ զինուորական գործողութիւններ կատարելէ», յայտնեց նախագահ Սերժ Սարգսեան:
| All the contents on this site are copyrighted ©. |