Սերպիոյ նախագահ Պորիս Թատիչի հրաւէրով Հայաստանի նախագահ Սերժ Սարգսեան երէկ երկօրեայ
պաշտօնական այցելութեամբ մեկնեցաւ Սերպիա: Հանրապետութեան նախագահին դիմաւորման պաշտօնական
արարողութենէն ետք տեղի ունեցաւ Հայաստանի եւ Սերպիոյ նախագահներուն դռնփակ հանդիպումը,
ապա` երկու երկիրներու պաշտօնական պատուիրակութիւններուն մասնակցութեամբ ընդլայնուած
կազմով հանդիպումը: Բանակցութիւններուն յաջորդեց փաստաթուղթերու ստորագրման արարողութիւնը:
Մասնաւորաբար ստորագրուեցան երկու միջ-կառավարական համաձայնագիրներ` «Օդային հաղորդակցութիւններու
մասին» եւ «Դիւանագիտական եւ ծառայողական-պաշտօնական անձնագիրներ կրող անձերու մուտքի
արտօնագիրի պահանջի վերացման մասին», ինչպէս նաեւ «2011-2013 թուականներուն մշակոյթի
մարզին մէջ համագործակցութեան մասին» գործնական ծրագիրը` Հայաստանի եւ Սերպիոյ մշակոյթի
նախարարութիւններուն միջեւ: Նախագահներ Սերժ Սարգսեան եւ Պորիս Թատիչ լրատուամիջոցներու
հետ հանդիպման ընթացքին ներկայացուցին բանակցութիւններու արդիւնքները: Նախագահներ Սարգսեան
եւ Թատիչ ընդգծեցին, որ Հայաստանի եւ Սերպիոյ միջեւ գոյութիւն ունեցող քաղաքական երկխօսութիւնը
եւ առեւտրական-տնտեսական ու քաղաքական մարզերուն մէջ համագործակցութիւնը զարգանալու լուրջ
ներուժ ունին: Նախագահ Սերժ Սարգսեան նշեց, որ իր սերպ գործընկերոջ խնդրանքով ներկայացուց
Լեռնային Ղարաբաղի հիմնախնդիրի լուծման ներկայ հանգրուանին մանրամասնութիւնները: Նախագահները
համաձայնեցան, որ խնդիրին խաղաղ լուծումը այլընտրանք չունի եւ ուժի կիրարկումն ու անոր
սպառնալիքը անընդունելի են միջազգային իրաւունքի տեսակէտէն: Պաշտօնական այցելութեան
ծիրին մէջ երէկ նախագահ Սերժ Սարգսեան հանդիպումներ ունեցաւ նաեւ Սերպիոյ վարչապետ Միրքօ
Ցվեթքովիչի եւ Ազգային ժողովի նախագահ Սլավիցա Ճուքիչ Տեյանովիչի հետ: Վարչապետ Միրքօ
Ցվեթքովիչի հետ հանդիպման ընթացքին անդրադարձ կատարուեցաւ հայ-սերպական տնտեսական համագործակցութիւնը
զարգացնելու եւ երկու երկիրներուն միջեւ առեւտրաշրջանառութեան ծաւալները ընդլայնելու
կարելիութիւններուն.