У ПАР расце сацыяльнае напружанне

Хрысціянскія лідэры Паўднёва-Афрыканскай Рэспублікі занепакоены ростам сацыяльнай напружанасці ў краіне. За мінулыя тыдні ў пяці правінцыях краіны прайшлі жорсткія сутыкненні маніфестантаў з паліцыяй.

У заяве Паўднёва-Афрыканскай рады Касцёлаў, да якой належыць таксама Канферэнцыя Каталіцкіх Біскупаў Паўднёвай Афрыкі, гаворыцца, што наяўнасць сутыкненняў з’яўляецца сігналам трывогі ў краіне. У сваім звароце хрысціянскія лідэры заклікаюць улады краіны прыняць неабходныя меры для вырашэння існуючых праблем.

“Гвалтоўная рэакцыя насельніцтва краіны падыктавана незадаволенасцю з-за адсутнасці сацыяльных паслуг”, - пішуць у сваім звароце хрысціянскія лідэры. Выступленні “з’яўляюцца рэзкім папяраджаннем у бок уладаў краіны і напамінам аб тым, што сітуацыя яшчэ больш пагоршыцца, калі мясцовая адміністрацыя і палітычныя партыі далей будуць ігнараваць патрэбы жыхароў краіны”.

Паводле хрысціянскіх лідэраў краіны пратэсты з’яўляюцца знакам незадаволенасці выбаршчыкаў сваімі абраннікамі, якія знаходзяцца ва ўладзе.