"Зварот да вытокаў". Царква як велічная вежа (візіі Гермаса)
Рады зноў вітаць Вас у эфіры Ватыканскага радыё. Перад намі сёння не абы-якая задача:
спасцігнуць сэнс пятага з'яўлення нябеснай жанчыны Гермасу, аўтару твора «Пастыр».
Памятаем,
што пасля чацвёртага з'яўлення пажылой велічнай жанчыны, анёл адкрыў Гермасу ейнае
імя: Эклесія, што значыць: царква. Незадоўга пасля гэтага Эклесія з'яўляецца зноўку
– гэта ўжо пятае з'яўленне жаночага вобразу – і загадвае Гермасу ісці на поле. Неўзабаве
і сама з'яўляецца там з шасцю юнакамі (відавочна, анёламі), кіруе да субяседніка свой
напамін, заклікае да стойкасці і мужнасці. Потым адсылае юнакоў словамі: «Ідзіце будаваць».
Пасля гэтага паказвае вежу, «якую тыя шэсць юнакоў будавалі на вадзе, выкарыстоўваючы
ў якасці будаўнічага матэрылу яснеючыя чатырохвугольныя камені, прычым некаторыя з
іх былі разбіваныя і адкідваныя вон» (Х).
- Што гэта за вежа? - пацікавіўся
Гермас. - Гэтая вежа – гэта я, Эклесія! - чуе ў адказ.(ХІ,3)
І тут
усплывае ў памяці старазапаветны вобраз «Вежы Давідавай» - сімвалу славы і моцы Ерусаліма.
У біблейнай кнізе «Песня па-над песнямі» закаханы юнак параўноўвае шыю сваёй узлюбленай
да гэтай вежы:
Як Давідава вежа - шыя твая, узнесеная
ўгору, тысячай шчытоў увешаная, - а ўсе шчыты – дужых. (Пп
4: 4, пераклад В. Сёмухі).
Такім чынам, вежа выдатна пасуе і ў якасці сімвала
мужчынскае сілы (бо вежа – мілітарны аб'ект) і ў якасці сімвала жаночай красы (дзеля
эстэтычнага эфекту, які рабіла на сваіх сузіральніках).
Атаесамленне вежы
і жанчыны ў адной ідэі Царквы сігналізуе, бадай, усведамленне Гермасам моцы супольнасці
веруючых у Хрыста. У піку пераследу хрысціян у другім стагоддзі, які наступіў у часы
імператараў Адрыяна і Антонія Пія, Гермас як быццам сніць сон пра моцную, незалежную
і трыюмфуючую Царкву. Спрадвеку створаная жанчына, якая вось сядзіць на троне і якой
падпарадкоўваюцца нябесныя анёлы, а таксама магутная вежа, будаваная са ззяючых шляхетных
камянёў – вось якой явіцца Царква ў візіях гэтага раннехрысціянскага візіянера. Ён
як быццам эмпірычна перажывае словы апостала Паўла: «Моц у слабасці ўдасканальваецца»
(1 Кар 12: 9).
Гермас пачынае пільна прыглядацца каменям, якія юнакі ўжываюць
да пабудовы вежы. Заўважае, што яны рознага тыпу.
- Што значаць гэтыя
белыя чатырохвугольныя камяні, якія выдатна пасуюць адзін да аднаго? - пытае Гермас
у Эклесіі. - Гэта апосталы, біскупы, вучыцелі і дыяканы, якія свецяць прыкладам
добрага жыцця і згаджаюцца паміж сабой, - чуе ў адказ. - А вунь тыя камяні,
што з водных глыбіняў дастаюцца? - Гэта мучанікі. - А камяні з сушы,
якія добра пасуюць да канструкцыі? - Гэта праведнікі. - А вунь тыя,
прынесеныя здалёк і ўключаныя ў пабудову? - Гэта навічкі, у якіх не знойдзена
ніякага зла. Анёлы павучаюць іх, каб заўжды чынілі дабро. - А тыя, адкідваныя
камені, каго азначаюць? - Гэта тыя, што саграшылі, але хочуць пакутаваць.
Анёлы іх не адкідаваюць далёка [могуць у любы час вярнуцца]. Але што будзе, калі будова
завершыцца, а яны так і не пакаюцца?
І так, у суме каля дзесяці катэгорый
камянёў пералічвае Гермас, а Эклесія за кожным разам дае тлумачэнне, каго гэтыя камяні
азначаюць. Варта тут, аднак, расшыфраваць яшчэ адзін сімвал. Вось жа фундаментам гэтай
велічнай вежы з'яўляецца... вада!
- Дык паслухай – кажа Эклесія – чаму
гэтая вежа будуецца на вадзе: бо праз ваду наша жыццё было збаўлена і надалей будзе
збаўляцца! (ХІ,5)
Безумоўна, маецца на ўвазе таіства хрышчэння.
Апроч
шасці юнакоў-будаўнікоў, Гермес пабачыў вакол вежы таксама сем жанчын, падтрымліваючых
вежу. Што гэта былі за жанчыны і які дакладна пасыл хаваўся за іхнім з'яўленнем –
пра гэта, шаноўныя слухачы, будзе гаворка роўна праз тыдзень, падчас нашай звычаёвай
пятнічнай перадачы.
А зараз развітваюся, зычу цудоўнага ўікенду, няхай мір
і мілата Ісуса Хрыста заўсёды будуць з Вамі.