Арцыбіскуп Кандрусевіч: у 20-гадовым узросце ўжо трэба прымаць адказныя рашэнні
Касцёл у Беларусі
адзначае ў гэтым годзе 20-годзе стварэння Мінска-Магілёўскай мітраполіі. Гістарычнасць
гэтай падзеі адзначыў у сваім лісце да вернікаў Мітрапаліт Тадэвуш Кандрусевіч.
“У
1989 г., пасля многіх дзесяцігоддзяў ганенняў на Касцёл, Ян Павел II прызначыў першага
біскупа ў якасці Апостальскага Адміністратара для католікаў лацінскага абраду ў Беларусі,
якім выпала павага стаць мне” - адзначыў іерарх. “Затым наступіў памятны дзень 13
красавіка 1991 г.,(…) калі ў Беларусі была ўстаноўлена Мінска-Магілёўская мітраполія.
(…) Адначасова былі прызначаны біскупы гэтых іерархічных структур: (…) ксёндз прэлат
Казімір Свёнтэк стаў першым Мінска-Магілёўскім арцыбіскупам Мітрапалітам і адначасова
Апостальскім адміністратарам Пінскай дыяцэзіі, а пробашч парафіі Святога Духа ў Вільні
ксёндз Аляксандр Кашкевіч – першым Гродзенскім біскупам”. “Пасля трох пакаленняў ганенняў
вернікі, нарэшце, атрымалі рэлігійную свабоду, якая па сваёй сутнасці з’яўляецца крыніцай
і сінтэзам усіх правоў чалавека” - заўважыў арцыбіскуп Кандрусевіч. У 1999 г. да структур
Каталіцкага Касцёла ў Беларусі далучылася новаўтвораная Віцебская дыяцэзія і прызначаны
яе першы біскуп – пробашч магілёўскай катэдры кс. Уладзіслаў Блін.
“Адзначаючы
20-годдзе адраджэння структур Каталіцкага Касцёла ў Беларусі, урачыстае святкаванне
чаго адбудзецца 19 чэрвеня 2011 г., - нагадаў ў сваім пасланні Мітрапаліт Мінска-Магілёўскі
- мы павінны яшчэ раз падзякаваць Богу за тое, што падчас ганенняў Ён пасылаў нам
сапраўды святых, руплівых і адданых справе служэння Касцёлу святароў. Іх было мала.
Ім было вельмі цяжка”. Паводле іерарха, сёння мы павінны дзякаваць Богу за нашых бацькоў
і дзядоў, якія ў вельмі складаных абставінах, калі веруючага лічылі чалавекам другой
катэгорыі, змаглі не толькі захаваць веру, але і перадаць яе маладым пакаленням. “Вучылі
як маглі, без філасофскай і тэалагічнай мудрасці”.
Кажучы аб перспектыве развіцця
Касцёла ў Беларусі Мітрапаліт заўважае, што сёння “нельга жыць толькі гісторыяй. З
яе трэба вучыцца і на ёй трэба будаваць”. А будаваць, паводле яго, ёсць што.
“20
гадоў адраджэння структур Каталіцкага Касцёла ў Беларусі – невялікі прамежак часу
ў гісторыі. Аднак, з іншага боку, - заўважыў у сваім лісце арцыбіскуп Кандрусевіч
- чалавек у 20-гадовым узросце ўжо павінен, або вельмі хутка будзе павінен, прымаць
адказныя рашэнні”. “Трэба належным чынам выкарыстоўваць наяўныя магчымасці, каб мы
так лёгка не паддаваліся секулярным і лібералістычным тэндэнцыям, плылі не па цячэнню,
але супраць яго” - заклікаў святароў і вернікаў у сваім пасланні Мітрапаліт Мінска-Магілёўскі.