Orisa: arrestohen 12 indianë të kthyer në fenë e krishterë, pa lejen e autoriteteve.
Në shtetin indian të Orisës, policia e zonës së Maiurbhanj arrestoi 12 anëtarë të
një fisi vendas, të kthyer në fenë e krishterë nga dy pastorë protestantë: Samuel
e Manuel Mohapatra di Baltasore të cilët, më pas, u zhdukën pa lënë gjurmë. Njoftimin
e jep AziaNjuz. Të dy kanë shkelur Aktin e Orisës për Lirinë Fetare (Orissa Freedom
of Religion Act) që ndalon kthimin nga një fe, në një tjetër, pa lejen e autoriteteve.
Të krishterët e rinj u arrestuan pas një padije, paraqitur në gjykatë pak ditë më
parë kundër dy pastorëve e 13 anëtarëve të fisit, kthyer në krishterim. Një prej tyre
arriti të shpëtonte nga arresti. Sajan K. George, kryetar i Global Council of
Indian Christians (Gcic), e dënoi vendimin e autoriteteve të zonës, duke i kërkuar
Naveen Patnaik-ut, kryeministër i Orisës, t’i tërheqë akuzat kundër të arrestuarve
dhe t’i japë fund një herë e mirë ushtrimit të dhunës kundër të krishterëve në vend.
“I kërkojmë kryeministrit të Orisës – pohon ai - të nisë hetimet kundër funksionarëve
të policisë, që vijojnë prej kohe t’i frikësojnë si anëtarët e fiseve, ashtu edhe
barinjtë protestantë të zonës Maiurbhanj. Sipas aktivistit, qeveria vendase duhet
t’i ndalojë të gjithë ata, që e përdorin ligjin për të persekutuar popullsinë, duke
e interpretuar shtrembër Kushtetutën, e cila bazohet mbi respektin, drejtësinë e lirinë.
“Ky veprim i policisë dhe i ekstremistëve hinduistë të Sangh Parivarit – shton – është
shkandullues. Madje mund ta quash parodi të vizionit të fisëm, që është në bazë të
idealeve të sanksionuara nga Kushtetuta indiane”. Në këto vite, zona e Maiurbhanj
ka qenë teatër i akteve të vazhdueshme të dhunës kundër të krishterëve, të sulmuar
padrejtësisht nga fanatikët hinduistë. Më 22 janar 1999, Graham Stewart Staines, misionar
anglikan australian dhe të bijtë, Filipi e Timoteu, u dogjën të gjallë, ndërsa flinin
në kamperin e tyre, në fshatin Manoharpur. Në të njëjtin vit, atë Arul Doss, prift
i kishës së Anandpurit, u sulmua nga 10 ekstremistë, që e mbytën duke e gjuajtur me
shigjeta e pastaj e dogjën në kishën e tij. Orisa është një nga gjashtë shtetet (Madhya,
Pradesh, Gujarat, Tamil Nadu, Rajastan, Arunachal Pradesh), ku është në fuqi ligji
kundër kthimit nga një fe, në një tjetër. Ligji u hartua dhe u miratua sipas dëshirës
së një grupi ekstremistësh huinduistë, të lidhur me partinë e opozitës Bharatiya Janata
Party (Bjp), për të ndaluar të ashtuquajturin ‘prozelitizëm” ose konvertimet me pagesë.
Asnjë nga këto akuza deri më sot nuk është provuar.