Benedikti XVI në Engjëllin e Tënzot kujton Gjon Palin II: “Papë e dëshmitar i madh
i Krishtit”.
(04.04.2011 RV)Dje, në lutjen e Engjëllit të Tënzot, Benedikti XVI kujtoi,
me nderim të thellë, Papën dhe dëshmitarin e madh të Krishtit, Gjon Palin II. Më pas
i ftoi turmat e besimtarëve, mbledhur në Sheshin e Shën Pjetrit, ta provojnë dhuratën
e dashamirësisë së Zotit në kohën e Kreshmëve. Në takimin me Krishtin, kujtoi Papa,
gjejmë forcën për të fituar mbi të keqen e për të bërë të mirën.
Benedikti
XVI kujtoi me dashuri Paraardhësin e tij të dashur, një ditë pas përkujtimit të gjashtëvjetorit
të vdekjes së Gjon Palit II, në sa afrohet dita e shumëpritur, 1 maji, kur Papa Vojtila
do të lartohet në nderimet e lterit. Prandaj, shpjegoi Papa Racinger, nuk e kremtova
Meshën tradicionale për shpirtin e tij, por u mjaftova ta kujtoj me dashuri në lutje,
ashtu si ju kujtoj ju të gjithëve: “Ndërsa, duke ecur në udhën kreshmore,
përgatitemi për festën e Pashkëve, i afrohemi me gëzim edhe ditës kur do të mund ta
nderojmë si të Lum këtë Papë të madh, dëshmitar të jashtëzakonshëm të Krishtit, e
t’i lutemi edhe më shumë të ndërmjetësojë për ne”. Më pas, ftesa e Benediktit
XVI që ta provojmë dhuratën e dashamirësisë së Zotit, posaçërisht në këtë kohë Kreshmësh,
kohë mëshire e hiri. Duke kujtuar temën e gëzimit, përmes faqes së djeshme ungjillore,
në të cilën Jezusi shëron një njeri, që kishte lindur i verbër, Benedikti XVI vuri
në dukje rrugën e fesë. Këtë rrugë njeriu i thjeshtë e i sinqertë e ndjek hap pas
hapi: në fillim e takon Jezusin, si njeri ndërmjet njerëzve; pastaj e quan profet
e, së fundi, kur sytë e tij të verbër hapen e ai nis të shikojë qartë, e shpall Zot.
Farizejtë, përkundrazi, nuk duan ta pranojnë mrekullinë, ndërsa turma e ndjek nga
larg me indiferencë. E deri prindërit e të verbërit, që fiton mrekullisht dritën e
syve, në vend që të gëzohen, kanë frikë nga fjalët e botës: “Edhe ne, për
shkak të mëkatit të Adamit, lindëm të verbër, por në gurrën e Pagëzimit, sytë tanë
u hapën nga hiri i Krishtit”. Në se mëkati e plagosi njerëzimin, duke e
dënuar me errësirën e vdekjes, në Krishtin shkëlqen përsëri drita e jetës, caku i
fundmë, drejt të cilit jemi të thirrur të ecim, nënvizoi akoma Papa. Nga feja marrim
forcën për të fituar mbi të keqen e për të bërë të mirën: “Në të vërtetë
jeta e krishterë është përpjekje e vazhdueshme për t’i përngjarë Krishtit, figurë
e njeriut të ri, që na prin drejt bashkimit të plotë me Hyjin”. Jezusi
është drita e botës! Ai vijon të na tregojë kuptimin e vërtetë të jetës njerëzore,
në sa ecim në rrugët e ndërlikuara, përplot me prita, të historisë: “Kur
jeta jonë ndriçohet nga misteri i Krishtit, provohet gëzimi i pakufishëm i çlirimit
nga çdo gjë, që e kërcënon realizimin tonë të plotë”. Në përfundim, thirrja:
“Në këto ditë, të cilat na përgatisin për Pashkë, ta përtërijmë në shpirtin tonë dhuratën,
që morëm në Pagëzim”: “Atë flakë, që nganjëherë rrezikon të shuhet, ta ushqejmë
me lutje e me dashuri për të afërmin”.