“Бог ёсць любоў” – другое вялікапостнае казанне айца Канталамесы
1 красавіка, Бэнэдыкт
XVI, разам з прадстаўнікамі Рымскай курыі выслухаў другое казанне айца Раньера Канталамесы,
прапаведніка Папскага дома. Сённяшняе разважанне айца Канталамесы называлася “Бог
ёсць любоў”.
У ім вядомы прапаведнік закрануў розныя аспекты Боскай прыроды.
Па-першае, ён звярнуў увагу на прысутнасць любові ў вечнасці. “Св. Ян прадстаўляе
нам не толькі Бога, які любіць, але Бога, які сам з’яўляецца любоўю. “На пачатку была
любоў, і любоў была ў Богу і Бог быў любоўю”: так мы можам патлумачыць, яго словы
“Бог ёсць любоў”, - адзначыў айцец Канталамеса. Акрамя таго, ён дадаў: “Сёння ідзе
шмат дыскусій аб існаванні Бога; але я веру, што больш важнай з’яўляецца вера у тое,
што Бог ёсць любоўю. Калі б, напрыклад, Ён існаваў, але не быў любоўю, для нас было
б больш падставаў баяцца яго, чым радавацца, што нажаль, вельмі часта здаралася ў
многіх народаў і цывілізацый”.
“Калі любоў, якая існуе па-за часам увайшла
ў наш свет, пачалася гісторыя збаўлення. І першым яе этапам было стварэнне. Бог стварае
з любові”, адзначыў прапаведнік. “Як адрозніваецца хрысціянскае бачанне стварэння
сусвету ад атэістычнага? - запытаў ён - Параўнайце: якія могуць з’явіцца глыбокія
перажыванні калі малады чалавек ці дзяўчына даведаюцца, што з’явіліся на гэты свет
выпадкова, нечакана, непажадана, праз памылку бацькоў. Навуковы атэізм прапаноўвае
менавіта такія перажыванні ўсяму чалавецтву”, - сказаў айцец Канталамеса.
Прапаведнік
Папскага дома звярнуў увагу на праяву Боскай любові ў аб’яўленні прарокам і ў сваім
уцелаўленні. “Уцелаўленне з’яўляецца кульмінацыяй Божай любові. Бог хацеў уцелаўлення
Свайго Сына, не толькі каб мець кагосці па-за Сабой хто будзе любіць Яго годным спосабам,
але перш за ўсё, каб мець па-за Сабой кагосці, каго Ён будзе любіць спосабам годным
Сябе!”, - адзначыў італьянскі капуцын.
Акрамя таго, ён звярнуў увагу на тое,
што “гісторыя Божай любові не скончылася з Пасхай, але працягваецца і сёння. Божая
любоў улілася ў нашыя сэрцы праз Святога Духа, які да нас быў пасланы. І так мы сталі
“удзельнікамі Боскай прыроды”, г.зн. удзельнікамі Божай любові”.
Напрыканцы
свайго казання айцец Канталамеса заахвоціў верыць у любоў Бога, негледзячы на тое,
што гэтая любоў застаецца вялікай таямніцай. “Людзі маюць патрэбу верыць, што Бог
іх любіць і ніхто лепш за вучняў Хрыста не зможа перадаць ім гэтую добрую навіну”,
- адзначыў у сваім другім велікапосным казанні прапаведнік Папскага дома.