Պենետիկտոս ԺԶ Սրբազան Քահանայապետի Գործունէութիւնը

Այսօր Ուրբաթ 1 Ապրիլ 2011, առաւօտեան ժամը 9ին Պենետիկտոս ԺԶ Սրբազան Քահանայապետը <<Փրկչին Մայր>> մատրան մէջ մասնակցեցաւ Մեծ Պահքի երկրորդ խորհրդածութեան զոր կատարեց Հայր Րանիէրօ Գանդալամեսսան` Քահանայապետական Տան քարոզիչը։Այսօրուան մտածականի նիւթն էր Կողոսացիներու թուղթէն առնուած հետեւեալ հատուածը <<Ամէն բանէ վեր, սիրով լեցուեցէք. սէրը կատարելութեան զօդն է >> ։ Խորհրդածութիւնը կեդրոնացաւ այն խոչնդոտներուն որոնց կը հանդիպի աւետարանացումը արդի աշխարհի մէջ ու մանաւանդ <<սիրոյ աշխարհականացումի>> նիւթը ։
Ժամը 11-ին Սրբազան Քահանայապետը իր գրասենեակին մէջ ընդունեց Հաւատոյ Ժողովի Կառավարիչ Կարտինալ Ուիլիամ Նեվատան` եւ իրեն ընկերացող երկու եպիսկոպոսներ։ Ապա նորին սրբութիւնը ունկնդրութիւն շնորհեց Հնդկաստանի Ասորի Մալապար կարգ մը եպիսկոպոսներուն եկած իրենց հնգամեայ կանոնական այցելութիւնը կատարելու սուրբ Պետրոսի յաջորդին։