Qeveria japoneze kërkon mbylljen e të gjithë reaktorëve të Fukushimës
(30.01.2011 RV)Në Japoni rritet alarmi për emergjencën bërthamore. Qeveria
e Tokios kërkoi mbylljen e të gjithë reaktorëve të Fukushimës dhe dha urdhër për të
kontrolluar të gjitha centralet bërthamore të vendit. Ndër vullnetarët, që punojnë
me rrezik jete për të shmangur një katastrofë të mundshme, janë edhe disa të krishterë,
siç referon për agjensinë Fides, ipeshkvi i Sendait, qytetit më të dëmtuar nga tërmeti
e tsunami. Pikërisht për ta, për “heronjtë e krishterë të Fukushimës” (siç quhen),
ditët e kaluara u organizua në Singapur, një mbrëmje lutjeje e bashkësisë së krishterë
ungjillore. Ndërkaq, 300 m larg centralit, niveli i jodit radioaktiv në det është
3.355 herë më i lartë se kufiri i caktuar me ligj. Greenpeace njofton se do të matet
edhe radioaktiviteti i ushqimeve, duke pasur parasysh gjithsesi se periudha e përgjysmimit
të jodit është tetë ditë, prandaj problemet që mund të shkaktojë janë relativisht
të vogla. Ndryshe do të ishte puna nëse do të shpërthente bërthama e reaktorit dhe
do të çlirohej plutonium, periudha e përgjysmimit të të cilit është 24 mijë vjet.