“Vizioni për një Libi Demokratike”: plani i zhvillimit të Libisë pas Gedafit
(29.03.2011 RV)U zhvillua në Londër konferenca mbi vendin arab, me pjesëmarrjen
e rreth 40 ministrave të jashtëm e përfaqësuesve ndërkombëtarë. Nuk mori pjesë Bashkimi
Afrikan, ndërsa Lidhja Arabe dërgoi zv.sekretarin. E pranishme, edhe Selia e Shenjtë,
që përfaqësohej nga Nunci Apostolik në Britaninë e Madhe, imzot Antonio Menini. Quhet
“Vizioni për një Libi Demokratike” plani i zhvillimit të Libisë pas Gedafit, që paraqiti
sot në Londër Këshilli Kombëtar i Tranzicionit. Në bazën e tij, miratimi i Kushtetutës
dhe modelimi i shtetit sipas parimit të ndarjes së pushteteve. Pika të tjera të rëndësishme
janë zgjedhjet, garantimi i të drejtave themelore të njeriut, shteti ligjor. Plani
i opozitorëve libianë përkon me dëshirën e shteteve perëndimore për ta lënë Libinë
në duart e popullit të vet. Që mbrëmë, presidenti amerikan Barak Obama theksoi se
Uashingtoni do të largohet nga komanda e koalicionit sapo të vendoset përfundimisht
respektimi i zonës së ndalim-fluturimit mbi Libi, siç parashikon rezoluta e OKB-së.
Ky qëndrim u përsërit edhe sot nga sekretarja e shtetit, Hilari Klinton. Ndërsa
rebelët i afrohen Sirtes, pavarësisht se sot u zmbrapsën nga forcat e Gedafit, ky
i fundit, me një letër dërguar në konferencën e Londrës, u kërkon fuqive perëndimore
të lejojnë administrimin e krizës nga ana e Bashkimit Afrikan, duke mos harruar ta
krahasojë operacionin “Odiseja në agim” me fushatat e Hitlerit në Evropë. Ndërkaq,
vazhdon masakrën në Misratë, ku gjatë nëntë ditëve të luftimeve me rebelët, janë vrarë
mëse 120 vetë. Gazeta e Vatikanit “L’Osservatore Romano” shkruan sot se Gedafi
duhet të largohet menjëherë, pasi ka humbur legjitimitetin, duke u bërë jehonë fjalëve
të imzot Meninit në konferencën e Londrës, ku përfaqësuesi i Selisë së Shenjtë kërkoi
një “road map” për Libinë, pra një plan, ku të përfshihen të gjitha hapat për armëpushimin
e rindërtimin e vendit, pas Gedafit. E duket se po përvijohet një dalje e kolonelit
“me nder” nga loja, përmes strehimit në njërin nga shtetet afrikane, që nuk bëjnë
pjesë në Gjykatën Penale Ndërkombëtare.