2011-03-29 12:59:45

Յայտարարութիւն: Հայ կաթողիկէ պատրիարքարանը խստօրէն կը դատապարտէ Սրբուհի Մարիամ Աստուածածնայ եկեղեցւոյ դէմ կատարուած ռմբահարման անարգ ոճիրը


Հայ կաթողիկէ պատրիարքարանը խստօրէն կը դատապարտէ Կիրակի առաւօտ Ասորի ուղղափառ Սրբուհի Մարիամ Աստուածածնայ եկեղեցւոյ դէմ կատարուած ռմբահարման անարգ ոճիրը` Զահլէի մէջ եւ զօրակցութիւն կը յայտնէ Ասորի ուղղափառ համայնքի զաւակներուն եւ շրջանի ամբողջ բնակչութեան` հաւատքի պաշտպանութեան ու խաղաղ համակեցութեան հանդէպ իրենց անսասան յանձնառութեան մէջ:
Աղօթքի վայրերու եւ կրօնքի խորհրդանշաններու դէմ կատարուած որեւէ ոտնձգութիւն, առաւել եւս` բռնարարք, կը համարենք անընդունելի: Նման թշնամական արարքներ ձախողութեան դատապարտուած մարտահրաւէրներ են ընդդէմ մարդկային բարոյականութեան եւ տրամաբանութեան, ընդդէմ բոլոր կրօններու քարոզած այլասիրութեան եւ խաղաղասիրութեան ուսմունքներուն, որոնց գործադրութեան կարիքը այնքան կը զգացուի այսօրուան աշխարհին մէջ:
Ասորի ուղղափառ Սրբուհի Մարիամ Աստուածածնայ եկեղեցւոյ դէմ կատարուած յարձակումը ուղղուած է Զահլէի ու Պեքայի շրջանին եւ ամբողջ Լիբանանի մէջ քաղաքացիական համերաշխութեան, խաղաղ համակեցութեան, կայունութեան եւ ապահովութեան դէմ: Նաեւ` անիկա յարձակում մըն է ընդդէմ քրիստոնէութեան: Կոչ կ’ուղղենք բոլոր լիբանանցիներուն շրջահայեացօրէն եւ ամուր հաւատքով դիմագրաւելու նման փորձութիւններ` առիթ չտալու համար, որ խառնակութեան դրդող ուժեր յաջողութիւններ արձանագրեն իրենց նպատակներուն մէջ:
Գոհունակութիւն կը յայտնենք դէպքին առիթով երկրի բարձրագոյն ղեկավարութեան արագ արձագանգին համար եւ կը մաղթենք, որ ապահովական ուժերը կատարեն անհրաժեշտ բոլոր աշխատանքները` արագօրէն բացայայտելու համար անոր պատասխանատուները:
դիւան hայ Կաթողիկէ Պատրիարքարանի








All the contents on this site are copyrighted ©.