Lumnimi i Papës Gjon Pali II: priten 300 mijë shtegtarë
(29.03.2011 RV)U zhvillua sot në Romë një konferencë shtypi mbi lumnimin e
Papës Gjon Pali II, në të cilën organizmi për shtegtimet kishtare “Opera Romana Pellegrinaggi”
sqaroi disa çështje teknike e organizative. Më 1 maj, në ditën e ngritjes së Papës
Vojtila në nderimet e elterit, priten së paku 300 mijë shtegtarë, por Roma është gati
të mirëpresë edhe më shumë. Po fuqizohen strukturat në zonën rreth Sheshit të Shën
Pjetrit, ndërsa për të rinjtë po bëhen gati kampuse në Çivitavekia e në Fiumiçino,
pranë, por jashtë kryeqytetit italian. Mëse 2.500 vullnetarë janë caktuar t’u japin
informacion njerëzve, që do të vijnë ato ditë. Me shoqatën e pronarëve të hoteleve
është nënshkruar një Kartë etike, për të shmangur spekullimet. Është ideuar një kartë,
që quhet “JP2-pass” dhe kushton 18 euro, për të siguruar udhëtimet me autobuz, tram
e metro, të cilat do të funksionojnë deri në orën 2 të natës. Karta ka vlerë triditore
dhe parashikon një drekë të thjeshtë, që mund të merret me vete më 1 maj, si edhe
informacionet e nevojshme për ngjarjet e lumnimit të Gjon Palit II. Atë ditë, njerëzit
mund të hyjnë në shesh, duke filluar nga ora 5 e mëngjesit, pa biletë. Të shtunën
në mbrëmje, pas lutjes në “Circo Massimo” të Romës, në orën 20.00, kishat e qendrës
do të qëndrojnë hapur gjithë natën.