Ipeshkvijtë e Veriut të Afrikës, njëzëri me Papën, i thonë ‘jo’ luftës.
“Ipeshkvijtë e Afrikës së Veriut (Marok, Algjeri, Tunizi, Libi), të cilëve u duhet
t’u bëjnë ballë proceseve të evolucionit historik në vendet arabe, e sidomos në Magreb,
dëshirojnë të përsërisin thirrjen e tyre për t’i dhënë fund këtij konflikti të dhimbshëm,
duke gjetur një rrugë të drejtë e të denjë për të gjithë. Prandaj bashkuan zërat me
zërin e Papës, në thirrjen që bëri dje, gjatë lutjes së Engjëlit të Tënzot, njofton
një komunikatë dërguar Agjensisë Fides, nënshkruar nga imzot Vincent Landel, kryeipeshkëv
i Rabatit (Marok) dhe kryetar i Konferencës Ipeshkvnore të Afrikës Veriore (Cerna).
Prelatët e kësaj Konference pranojnë se ngjarjet e fundit, që vijojnë të trondisin
vendet e Magrebit, janë pasojë e dëshirës së ligjshme për liri, drejtësi e dinjitet,
posaçërisht nga ana e breznive të reja. E kjo dëshirë gjen shprehjen e vet në kërkesën
për t’u njohur si qytetarë, që janë në gjendje t’i marrin në dorë fatet e vendit e
të vetat; që kërkojnë punë, për të jetuar si njerëz; që luftojnë kundër çdo forme
të korrupsionit e të klientelizmit.Sot – vijon komunikata - era e ndryshimeve përshkon
mbarë Libinë. Prandaj ne bashkohemi posaçërisht me vëllezërit ipeshkvij të Tripolit
e të Bengazit, si dhe me të gjitha popullsitë e vendit. Edhe ipeshkvijtë e Veriut
të Afrikës ripohojnë se janë kundër dhunës e kundër luftës. “E dimë se lufta nuk i
zgjidh problemet e, kur shpërthen, është po aq e pakontrollueshme, sa shpërthimi i
reaktorit bërthamor. Viktimat e para janë gjithnjë më të varfërit e më të pafatët.
Përveç kësaj, duam s’duam, lufta në Lindjen e Mesme, e tani në Magreb, do të interpretohet
gjithnjë si kryqëzatë. E kjo do të ketë pasoja të pashmangëshme mbi marrëdhëniet vëllazërore,
që të krishterët kanë arritur të krijojnë me myslimanët në jetën e tyre të përditshme.
Ipeshkvijtë e Cerna-s kërkojnë ndërmjetësim diplomatik dhe bëjnë thirrje për ndihma
humanitare. “I lutemi të TejetLartit që t’i frymëzojë drejtuesit e kombeve të gjejnë
shtegun, që çon në drejtësi e paqe” përfundon komunikata.