(28.03.2011 RV)Kanë kaluar 14 vjet nga eksodi i dytë i shqiptarëve, të cilët
të zhgënjyer nga falimentimi i skemave piramidale në vitin 1997, ikën sërish nga atdheu
i tyre për të kërkuar jetë më të mirë. Vendi më i afërt qe Italia, e cila u përpoq
ta zmbrapste këtë valë të dytë, pas asaj të viteve 91-92, duke dërguar në det anijet
ushtarake. E kështu, deti u shndërrua në varrezë: pikërisht si sot, më 28 mars 1997,
ditë e së Premtes së Madhe për katolikët, anija “Katër i Radës” u mbyt pas përplasjes
me korvetën ushtarake italiane “Sibilla”. Nga personat, që ishin ngjeshur në anije
për të lundruar drejt ëndrrës së tyre, vetëm 34 shpëtuan. Sipas versionit zyrtar viktimat
janë 81, pasi aq trupa pa jetë u nxorrën nga deti, por në të vërtetë, ishin 108 ata
që u zhdukën. Sot, siç ndodh çdo vit në Brindizi, nga moli përballë Kapitenerisë
së Portit u hodhën lule në det, varri, nga i cili trupat u nxorrën pas shumë kohësh
për t’ua dorëzuar familjarëve. Organizatorët e nismës kësaj radhe ishin Observatori
mbi Ballkanin dhe Observatori i përhershëm Itali-Shqipëri “për të kujtuar të gjithë
emigrantët, viktima të detit e për t’u solidarizuar me ata, që po vuajnë tmerret e
luftës”. Ndeshja në kanalin e Otrantos shkaktoi polemika me qeverinë e atëhershme
italiane të Romano Prodit. Brukseli gati e përjashtoi Romën nga Traktati i Shengenit.
Një kuriozitet: në filmin “Prilli” të regjisorit italian Nani Moreti, realizuar në
vitin 1998, vetë regjisori, i cili është zakonisht edhe aktori kryesor i filmave të
vet, pikërisht në bregun e Brindizit, zemërohet e bërtet kundër politikanëve të majtë
të kohës, përfshirë edhe Romano Prodin, të cilët as që denjuan të shkonin për të takuar
të mbijetuarit: “Nuk e çajnë fare kokën – thoshte Moreti – unë i kujtoj ata në Federatën
e të Rinjve Katolikë; shihnin vetëm filmin “Happy Days” (Ditë të Lumtura), ky është
formimi i tyre”. Procesi gjyqësor për Tragjedinë e Otrantos është i gjatë dhe i
mundimshëm. Para gjyqit dolën vetëm komandanti italian i Sibilës dhe ai shqiptar i
“Katër i Radës”. Pas 8 vjetësh - vendimi i shkallës së parë, që dënoi me tre vjet
burg italianin e me katër shqiptarin, ndërsa ai i shkallës së dytë akoma nuk ka dalë.
Për çdo viktimë, familjarëve iu dha 20 mijë euro, ndërsa çdo të mbijetuari, 13 mijë
euro.