E diel 27 mars, Kisha kremton të dielën e Tretë të kohës liturgjike të Krezhmëve,
e po sot më 27 mars, bie edhe përkujtimi i shën Rupertit, ipeshkëv i Salcburgut. Në
udhën shpirtërore të krezhmëve, Fjala e Zotit nënvizon simbolin e ujit. Kish i fton
besimtarët ta kuptojnë domethënien e këtij simboli në dritën e sakramentit të Pagëzimit
e të dhuratës së Shpirtit Shenjt. Të hënën më 28 mars kalendari kishtar
përkujton shën Kastorin e shën Linden, martirë. Liturgjia e ditës na kujton se feja
në Krishtin na bën të lirë, e megjithatë shpesh herë vazhdojmë të jemi skllevër të
besëtytnisë e të egoizmit. Të martën më 29 mars bie përkujtimi i shën Eustakut,
ipeshkëv i Napolit, shën Gulielmit, shën Ludolfit dhe shën Sekondit të Astit. Liturgjia
e ditës na kujton se Abrahami është modeli i besimtarit, sepse besimi i tij e ka themelin
në fjalën e Zotit e merr jetë nga dashuria dhe përvujtëria. Të mërkurën më
30 mars, kalendari kishtar përkujton shën Gjonin Klimaku, shën Leonardin Murialdo,
shën Sekonden e shën Amedeun. Liturgjia na kujton se në në ditën e ankthit, shpirti
ynë mund të qetësohet vetëm duke thirrur në ndihmë Zotin e duke dëgjuar Fjalën e Tij.
Të enjten më 31 mars shën Amosi profet, shën Balbina, martire romake e
shën Beniamini, diakon e martir. Liturgjia e ditës na kujtojnë parafoljen e Besëlidhjes
së Vjetër sipas së cilës misioni i Jezusit është të formojë nga gjithë popujt, një
popull të vetëm. Të premten më 1 prill kalendari përkujton shën Venancin, ipeshkëv
e martir, shën Ugon, ipeshkëv.
Të shtunën që vjen më 2 prill, kalendari
kishtar përkujton shën Françeskun nga Paola, vetmitar, themelues i Urdhrit të vetmitarëve
të vegjël dhe shën Marinë egjiptiane, pendestare. Më 2 prill bie përvjetori
i vdekjes së Papës Gjon Palit II (2005).
Të dielën e ardhshme më 3 prill
Kisha do të kremtojë të dielën e 4-të të Krezhmëve ( e diela e Gëzimit). E po
të dielën më 3 prill kalendari kishtar përkujton edhe shën Sistin I papë; shën Gjonin,
ipeshkëv i Napolit dhe shën Rikardin, ipeshkëv i Çiçesterit në Angli. Në udhën
e Krezhmëve Liturgjia e Fjalës së Zotit rrëfen ngjarjen e të verbrit të lindur të
shëruar nga Jezusi. Kisha na kujton se për të fituar errësirat e verbëritë e zemrës
kemi nevojë për Krishtin, dritën e botës. E në kohën shpirtërore të krezhmëve, Kisha
na ofron sakramentin e Pendesës e të Pajtimit për shërimin tonë shpirtëror e njerëzor.