ՄԻՆՍՔ-ի Խմբակի Համանախագահները Անընդունելի Կ՝որակեն Ուժի Կիրարկման Սպառնալիքը
Քաղաքացիական Օդանաւերու Նկատմամբ։
ԵԱՀԿ-ի Մինսքի խմբակի համանախագահները, Վիեննայի մէջ 23-24 մարտին Մինսքի խմբակին ներկայացնելէ
ետք հրապարակեցին Լեռնային Ղարաբաղի մօտակայ շրջաններուն մէջ իրականացուած դիտարկման
գործադիր ամփոփումը: «Այդ տարածքներուն դաժան իրականութիւնը վերահաստատեց համանախագահներու
այն տեսակէտը, որ սթաթիւս քոն անընդունելի է եւ տագնապի միայն խաղաղ, բանակցային լուծումը
կրնայ աւելի լաւ եւ հաստատուն ապագայի հեռանկարներ բանալ այն մարդոց համար, որոնք անցեալին
ապրած են այդ տարածքներուն մէջ եւ այժմ այնտեղ կ՛ապրին», ըսուած է համանախագահներուն`
Պեռնար Ֆասիէի (Ֆրանսա), Ռոպըրթ Պրատքէի (Միացեալ Նահանգներ) եւ Իկոր Փոփովի (Ռուսիա)
հրապարակած յայտարարութեան մէջ: Համանախագահները նաեւ տեղեկացուցին, որ մօտիկ ապագային
պիտի այցելեն շրջան` ղարաբաղեան տագնապի լուծման հիմնարար սկզբունքներուն շուրջ քննարկումները
շարունակելու` օգտուելով 5 մարտին Սոչիի մէջ Ռուսիոյ, Հայաստանի եւ Ազրպէյճանի նախագահներու
հանդիպման իբրեւ արդիւնք յառաջացած տեղական տեղաշարժէն: Յայտարարութեան մէջ ըսուած
է, որ համանախագահները իրենց զրուցակիցներուն հետ նաեւ պիտի մշակեն ճշգրիտ նախաձեռնութիւններ,
որոնք թոյլ պիտի տան կեանքի կոչելու Սոչիի մէջ ստանձնուած պարտաւորութիւնները` զինադադարի
խախտումներուն վերաբերեալ բոլոր կողմերու մասնակցութեամբ հետաքննութիւններ կատարելու
վերաբերեալ: Կրկին ընդգծելով, որ տագնապին կողմերը պէտք է զսպուածութիւն ցուցաբերեն
իրենց առած քայլերուն մէջ, ինչպէս նաեւ հրապարակային կոչերուն մէջ, համանախագահները «անընդունելի»
որակեցին ուժի կիրարկման սպառնալիքը քաղաքացիական օդանաւերու նկատմամբ: «Այս առումով,
համանախագահները խստիւ կը դատապարտեն սպանութիւններու եւ հակահարուածներու անիմաստ շրջապտոյտը
առաջին գիծի երկայնքով եւ կը վերահաստատեն իրենց նախկին դիրքորոշումը, որ կողմերը իրենց
ժողովուրդը պէտք է պատրաստեն խաղաղութեան եւ ոչ թէ պատերազմի», նշեցին համանախագահները: