Benedikti XVI ipeshkvijve indianë siro-malankarezë: bashkësitë e vogla kristiane japin
dëshmi të jashtëzakonshme.
(25.03.2011 RV)Ndonëse pakicë, të krishterët e Indisë janë të thirrur të japin
ndihmesën e tyre për të mirën e shoqërisë: është kjo porosia që Benedikti XVI i dha
një grupi ipeshkvijsh siro-malankarezë, të cilët i priti sot paradite në Vatikan,
me rastin e vizitës së tyre “ad Limina Apostolorum”. Papa theksoi posaçërisht rëndësinë
e lidhjes së ngushtë të ipeshkvijve indianë me Selinë Apostolike dhe inkurajoi nismat
për formimin e laikëve. Formimi i laikëve dhe roli i krishterimit në historinë
e Indisë: këto ishin dy temat kryesore në fjalimin e Papës, drejtuar ipeshkvijve indianë
të ritit siro-malankarez. Benedikti XVI theksoi në mënyrë të veçantë rëndësinë e lidhjes
shpirtërore të ipeshkvijve me Selinë e Shën Pjetrit. Më pas, edhe rolin e krishterimit
në jetën e vendit të madh aziatik: “Due to its ancient roots and distinguished
history…” “Falë rrënjëve të tij të lashta dhe historisë së tij të pasur,
krishterimi i dha një kontribut të rëndësishëm kulturës dhe shoqërisë indiane si dhe
shprehjeve të saj shpirtërore e fetare”. Ishte, kjo, ftesë, drejtuar mbarë Kishës
në vend, që t’i japë një kontribut gjithnjë më të madh shoqërisë indiane, për të mirën
e përbashkët: “I note the particular challenges to many…” I kuptoj
mirë – shtoi Benedikti XVI – sfidat që duhet të përballojnë shumë nga famullitë tuaja,
në mënyrë të posaçme, ato që nuk e kanë vazhdimisht pranë meshtarin. E megjithatë,
kujtoi Papa, duke pasur ndër mend realitetin shoqëror, në të cilin jetojnë të krishterët,
në një kontekst kulturor më të gjerë, famullitë e vogla të krishtera i kanë, edhe
ato, mundësitë për të punuar me frymë vërtet vëllazërore. E tregon vetë fakti se pikërisht
këto bashkësi të vogla kanë dhënë dëshmi të jashtëzakonshme në jetën e Kishës. Ashtu
si në kohët apostolike, vijoi të pohonte Papa, Kisha e kohëve tona do të lulëzojë
në praninë e gjallë të Krishtit, i cili na premtoi se do të jetë gjithmonë me ne.
Më pas u ndalua tek rëndësia e formimit të bashkësive të krishtera, posaçërisht përmes
programeve të katekizmit, të propozuara nga Kisha vendase. “Catechesis and
spiritual development...” Katekizmi dhe rritja shpirtërore, nënvizoi Ati
i Shenjtë, janë dy nga sfidat më të rëndësishme, që duhet të përballojnë barinjtë
e Kishës. Prej këndej, inkurajimi për ta vijuar ecjen në këtë rrugë e për të formuar
njerëz me vetëdije e dashuri të thellë ndaj Ungjillit.