24 сакавіка адзначаецца
Дзень малітвы і посту да місіянераў мучанікаў. Касцёл узгадвае пастыраў, якія ў 2010
г. далі найвышэйшае сведчанне Евангеллю, ахвяраваўшы сваім жыццём.
Ініцыятыва
Дня малітвы і посту каардынуецца Канферэнцыяй Каталіцкіх Біскупаў Італіі ў супрацоўніцтве
з Моладзевым місіянерскім рухам і Папскімі місіянерскімі ініцыятывамі. Дата ўспаміну
святароў мучанікаў была выбрана не выпадкова, менавіта 24 сакавіка 1980 г., падчас
св. Імшы, быў забіты арцыбіскуп Сан Сальвадора Оскар Рамэро.
Дэвіз сёлетняга
Дня малітвы і посту – “Трываць у надзеі”. Арганізатары падзеі прапануюць паразважаць
у эсхаталагічным кантэксце над асобай місіянера, які аддае жыццё і працягвае справу
Касцёла падтрымліваючы вернікаў падчас цяжкасцяў і выпрабаванняў. Забіты святар, такім
чынам, становіцца “даўцам новай надзеі, крыніцай даверу і пасланнем, якое пераўзыходзіць
час і прастору”.
Згодна са справаздачай, падрыхтаванай агенцтвам “Fides”, у
2010 г. у свеце было забіта 25 місіянераў і пастыраў. Сярод іх два біскупы, святары,
законнікі і законніцы, семінарысты і свецкія, якія паходзілі з Амерыкі, Азіі, Афрыкі
і Еўропы. Сярод кантынентаў, на якіх місіянеры часцей за ўсё аддавалі сваё жыццё,
Амерыка, Азія і Афрыка.