«Сёння свету патрэбны
мір, а ўсе, хто верыць у Бога, павінны заўсёды быць крыніцай міру і ствараць мір»,
— адзначыў Бэнэдыкт ХVI падчас сённяшняй агульнай аўдыенцыі. У сваёй катэхезе Папа
ўзгадаў святога Лаўрэнція з Брындызі, які жыў на рубяжы ХVI–ХVIІ стагоддзяў. Святы
Лаўрэнцій вядомы як выдатны прапаведнік і абаронца каталіцызму ў часы Рэфармацыі.
«Ад самага дзяцінства святы Лаўрэнцій захапляўся ордэнам святога Францішка
з Асізі. У 1575 годзе стаў капуцынам, а ў 1582 годзе атрымаў святарскае пасвячэнне.
Ужо падчас вучобы Лаўрэнцій праявіў выдатныя інтэлектуальныя здольнасці. З лёгкасцю
вывучаў старажытныя мовы — грэчаскую, іўрыт, сірыйскую, а таксама сучасныя — французскую
і нямецкую», — адзначыў Папа.
Святы Лаўрэнцій добра ведаў не толькі Біблію,
але і рабінскую літаратуру, што выклікала здзіўленне рабінаў, а таксама вялікую павагу
да яго. Грунтоўнае веданне Святога Пісання і твораў Айцоў Касцёла давала яму магчымасць
навучаць каталіцкай дактрыне хрысціян, асабліва ў Германіі, якія далучыліся да Рэфармацыі.
Ён даваў тлумачэнне ўсім артыкулам веры, якія аспрэчваў Марцін Лютэр. Сярод іх, між
іншым, першынство святога Пятра і яго наступнікаў, апраўданне як унутраная перамена
чалавека, неабходнасць добрых учынкаў для збаўлення.
Бэнэдыкт XVI нагадаў
і аб тым, якое значэнне мела прапаведніцтва св. Лаўрэнція для простых людзей. Пропаведзі
святога казалі ім аб неабходнасці жыць верай. Гэта была вялікая заслуга айцоў капуцынаў
і іншых манаскіх ордэнаў, якія ў ХVI і ХVII стагоддзях праз сваё сведчанне і навучанне
спрыялі аднаўленню хрысціянскага жыцця ў грамадстве. «Таксама і сёння новая евангелізацыя
патрабуе добра падрыхтаваных, руплівых і мужных апосталаў, каб святло і прыгажосць
Евангелля перамаглі плынь этычнага рэлятывізму, рэлігійнай індыферэнтнасці і ператварылі
розныя спосабы мыслення і дзейнасці ў сапраўдны хрысціянскі гуманізм», — дадаў Папа.
Святы
Лаўрэнцій з Брындызі мог выконваць гэтую працу ў многіх гарадах Італіі і ў іншых краінах,
нягледзячы на тое, што знаходзіўся і на іншых адказных пасадах. У ордэне капуцынаў
быў прафесарам тэалогіі, кіраўніком навіцыяту, неаднойчы з’яўляўся правінцыялам і,
нарэшце, у 1602-1605 гадах з’яўляўся генеральным настаяцелем Ордэна Меншых Братоў
Капуцынаў.
Святы Лаўрэнцій духоўнае жыццё вёў з выключнай стараннасцю, прысвячаючы
шмат часу малітве, а асабліва цэлебрацыі святой Імшы. Іншай рысай, характэрнай для
працы гэтага святога, — паведаміў Папа падчас сённяшняй аўдыенцыі, — была ягоная дзейнасць
на карысць міру. Яму былі даручаны важныя дыпламатычныя місіі для ўрэгулявання канфліктаў
і дасягнення згоды паміж еўрапейскімі дзяржавамі, якім пагражала ў той час Асманская
імперыя.
«Сёння, як і ў часы святога Лаўрэнція, свет мае патрэбу ў міры, свету
неабходны мужчыны і жанчыны, якія нясуць мір і прымірэнне. Кожны, хто верыць у Бога,
заўсёды павінен быць працаўніком на карысць міру», — дадаў Бэнэдыкт ХVI.
Лаўрэнцій
з Брындызі быў кананізаваны ў 1881 годзе. За актыўнае служэнне і глыбокія веды папа
Ян ХХІІІ у 1959 годзе надаў яму званне «Dottore apostolico». Гэтае прызнанне ён атрымаў
таксама за тое, што быў аўтарам шматлікіх прац па біблейскай экзэгезе, тэалогіі і
лістоў па прапаведаванню. У іх ён прапануе сістэматычны перагляд гісторыі збаўлення,
надаючы асаблівую ўвагу таямніцы Уцелаўлення — найбольшай праяве любові Бога да людзей.
«Уся
дзейнасць святога Лаўрэнція была натхнёна вялікай любоўю да Святога Пісання, якое
ён ведаў на памяць, і перакананнем, што слуханне і прыняцце Слова Божага спрыяе ўнутранаму
перамяненню, якое вядзе да святасці. Святы Лаўрэнцій з Брындызі вучыць нас любіць
Біблію, расці ў блізкасці з ёю, каб сябраваць з Панам у малітве, таму што кожнае дзеянне
мае ў Ім свой пачатак і канец», — адзначыў Бэнэдыкт ХVI на заканчэнне катэхезы, прамоўленай
падчас сённяшняй агульнай аўдыенцыі.