"У пошуку хрысціянскай ідэнтычнасці". Свядомае або несвядомае адкрыццё на спакусы
злога духа
Паважаныя слухачы, у нашых папярэдніх разважаннях мы звярнулі ўвагу на тое, што на
фарміраванне хрысціянскай ідэнтычнасці ўплываюць не толькі адносіны з Богам, але таксама
свядомае або несвядомае адкрыццё на спакусы злога духа. Яшчэ старажытныя айцы пустыні
заўважылі, што вернікі часта паддаюцца дзьвюм крайнасцям. З аднаго боку, хрысціяне
могуць паддацца тэндэнцыі да ігнаравання дзеяння злога духа. З другога боку, некаторыя
спяшаюцца ўсю віну за зло ў свеце зваліць на дэманічныя сілы.
У апошнія стагоддзі
імклівае развіццё прыродазнаўчых навук і тэхнікі нараджала ілюзію, што чалавечы розум
усё здолее спазнаць і растлумачыць. Вучоныя-рамантыкі імкнуліся даказаць, што божыя
і дэманічныя сілы – гэта ўсяго-толькі неспазнаныя дзеянні сіл прыроды. Аднак далейшае
развіццё навук прывяло да крызісу веры ва ўсемагутнасць чалавечага розуму. Вучоныя
пачалі прызнаваць існаванне звышнатуральных з’яваў. Навука і рэлігія сустрэліся. Цяпер,
на пачатку 21-га стагоддзя, можна заўважыць крызіс рацыяналізма і матэрыялістычнага
светаўспрымання. У выніку нагнятаецца другая крайнасць - цікавасць да паранармальных
з’яваў. Гэта дасканала ўпісалася ў адвечную спакусу чалавека стаць богам, быць валадаром
не толькі натуры, але і звышнатуральнага. У гэтай спакусе крыецца адраджэнне моды
на эзатэрыку, магію, акультызм.
Яшчэ старажытныя айцы Касцёла заўважалі, што
дзеянне злога духа заўсёды ідзе ў двух кірунках: зацямніць чалавечы розум і аслабіць
волю. Воля і розум чалавека – гэта тыя дзве вышэйшыя сферы, якія найбольш перашкаджаюць
знішчальнай дзейнасці сатаны. Таму злы ў першую чаргу імкнецца заблакаваць іх дзеянне.
У
сферы чалавечага інтэлекту дэман не можа нічога стварыць, ён не можа дадаць нам новых
думак, як сцвярджаў св. Максім Вызнаўца. Дэман імкнецца перадусім маніпуляваць вобразамі,
якія ўжо носіць у сабе чалавек. Нашае ўяўленне – гэта тая сфера, якая лёгка паддаецца
ўплывам эмоцый, выходзіць па-за межы разумнасці і кантролю. У практыцы можна заўважыць,
што большасць т.зв. грахоў у думках прыходзяць менавіта праз вобразы, уяўленне або
памяць. Гэта тыя сферы чалавека, якія найбольш падатныя на знішчальныя маніпуляцыі
злога духа. А калі ўлічыць, што сучасная культура з усіх бакоў атакуе нас светам вобразаў,
то ўзнікае пытанне: якімі вобразамі корміцца нашае ўяленне? Бо праз вобраз фарміруюцца
адпаведныя думкі, якія нараджаюць такія ж дзеянні. Разуменне таго, як шмат у нашым
жыцці залежыць вобразаў, якімі мы кормімся, схіляе нас да асаблівага дбання аб культуры
ўяўлення, каб адкрывацца толькі на добрую і карысную інфармацыю.
Акрамя ўяўлення,
магутным каналам маніпуляцыі з боку злога духа можа быць чалавечая памяць. Менавіта
сфера ўспамінаў часта становіцца крыніцай негатыўнага мыслення і дзеяння. Айцы Касцёла
звярталі ўвагу, што злых дух найчасцей маніпулюе нашымі ўспамінамі ў двух кірунках.
Першы – гэта пабуджэнне тугі па ранейшых “добрых” часах. Дэман імкнецца зацыкліць
чалавека на добрым успаміне з мінулага, каб адцягнуць увагу ад сучаснасці, ад рэальнага
жыцця. Другі кірунак спакушэння – гэта разварушванне старых ранаў, каб не дапусціць
іх загойвання. Паддаўшыся такой спакусе, чалавек зацыкліваецца на нейкім балючым успаміне,
становіцца яго рабом. Прывід мінулага пачынае кіраваць рэальнымі рашэннямі і дзеяннямі
асобы.
Мудрасць Божага Слова і шматвяковы духоўны вопыт Касцёла заклікае кожнага
хрысціяніна да чування. Разуменне стратэгіі дзеяння злога духа можа забяспечыць нас
ад жыццёвых драм і трагедый. Усведамленне таго, што злы дух не можа ўвайсці туды,
дзе прабывае Божы Дух, можа стаць заахвочваннем для кожнага верніка, каб запрашаць
Пана Бога ва ўсе сферы свайго жыцця.