Мітрапаліт Іларыён заклікаў католікаў сумесна бараніць хрысціянства
19 сакавіка ў нямецкім
горадзе Вюрцбург скончыў сваю працу IV міжнародны кангрэс фонду “Дапамога Касцёлу
ў патрэбе”. Сёлета тэмай форуму сталі “Шляхі збліжэння Каталіцкага Касцёла і Праваслаўнай
Царквы 20 год пасля распаду СССР”.
Выключнасць кангрэсу прыдала прысутнасць
кардынал Курта Коха, старшыні Папскай рады спрыяння хрысціянскаму адзінству і мітрапаліта
Іларыёна, кіраўніка Аддзела знешніх царкоўных сувязяў Маскоўскага Патрыярхату. Яны
заявілі аб “неабходнасці сумесных дзеянняў для абароны хрысціянскіх каштоўнасцяў у
сучасным свеце”.
На думку ватыканскага іерарха тэалагічная дыскусія аб прымаце
ў Касцёле, гэта толькі вяршыня айсберга, бо мэтай экуменічнага дылогу з’яўляецца “зварот
да бачнага адзінства”. Гэта “самы цудоўны матыў” экуменічнай дзейнасці, - сказаў
іерарх, - дадаўшы, што “бясконца важнымі” з’яўляюцца ўзаемныя адносіны, якія дазваляюць
ісці наперад “у прынцыповых пытаннях”.
Мітрапаліт Іларыён адзначыў, што за
апошнія 20 гадоў каталіцка-праваслаўныя адносіны былі складанымі ў сувязі з новай
палітычнай сітуацыяй у Еўропе пасля падзення Бярлінскай сцяны. Пасля абрання Бэнэдыкта
ХVI у адносінах паміж супольнасцямі дасягнуты “значны прагрэс” таму, што гэты Папа,
па словах Мітрапаліта, добра ведае праваслаўе.
Іерарх зазначыў, што католікі
і праваслаўныя сутыкаюцца з тымі ж выклікамі сучаснага свету, прычым справа “не ў
тэалагічных пытаннях але ў сучаснасці і будучыні чалавечай супольнасці”.
“Сёння
толькі Каталіцкі Касцёл і Праваслаўная Царква абараняюць традыцыйны лад сямейнага
жыцця. Я рады, што працягваецца канкрэтнае супрацоўніцтва ў гэтым напрамку”, - сказаў
Мітрапаліт Іларыён. “Таму я прапаную, каб мы выступалі разам, не супраць іслама і
секулярызму, але ў абарону хрысціянства і традыцыйных хрысціянскіх каштоўнасцяў”.
Падводзячы
вынікі форуму, кардынал Кох сказаў, што не трэба ісці на барацьбу з кімсці, але змагацца
за штосці. Ён запэўніў, што гэта таксама аснова для праграмы папы Бэнэдыкта ХVI.