Shugurimi i Kishës së re famullitare romake kushtuar Shën Korbinianit. Papa porosit:
“Bëjeni të njohur fytyrën e Zotit, ndihmojini familjet në vështirësi”.
(21.03.2011 RV)“Kush dëshiron të jetojë sipas vullnetit të Zotit, duhet të
ecë në gjurmët e Jezusit, duke e dëgjuar, duke ia pranuar fjalët e duke u thelluar
në kuptimin e tyre”: kjo është ftesa e Benediktit XVI, drejtuar dje besimtarëve të
famullisë romake të Shën Korbinianit, duke e kushtuar për shërbimet e kultit. Në homelinë
e Meshës, kremtuar me këtë rast, Papa foli kryesisht për bashkësinë e krishterë të
Kazal Palokos, ku sapo është ndërtuar Kisha e re, duke nënvizuar se misioni i besimtarëve
është t’ia çojnë të gjithëve lajmin e madh të dashurisë së Zotit, ta bëjnë fytyrën
e tij të njohur kudo e kurdoherë. U nis nga misteri
i Shndërrimit të Zotit, rrëfyer në Ungjillin e së Dielës II të Kreshmëve, Benedikti
XVI, për të shpjeguar se Hyji dëftohet në Krishtin, se kush dëshiron ta njohë, duhet
të kundrojë fytyrën e Jezusit; pikërisht në këtë fytyrë – vijoi Papa – ne mund të
shikojmë qartë shenjtërinë, mëshirën, vullnetin hyjnor: “Vullneti i Hyjit na
zbulohet plotësisht në vetjen e Jezusit. Kush dëshiron të jetojë sipas vullnetit të
Hyjit, duhet të ndjekë pas Jezusin, ta dëgjojë, t’ia pranojë fjalët e, me ndihmën
e Shpirtit Shenjt, të hyjë në zemrën e tyre”. Duke iu drejtuar besimtarëve
të famullisë, Papa kujtoi misionin e çdo bashkësie të krishterë: “.. misioni
i çdo bashkësie të krishterë është t’ia çojë të gjithëve mesazhin e dashurisë së Hyjit,
t’ua bëjë të njohur fytyrën e tij (…). Me vizitën time, dëshiroj t’ju inkurajoj ta
realizoni gjithnjë më mirë misionin tuaj në këtë Kishë me gurë të gjallë, që jeni
ju vetë.. ta bëni Kishën tuaj vend, në të cilin njeriu mëson të dëgjojë Fjalën e
Zotit, shkollë e përhershme e jetës së krishterë, prej nga niset çdo veprimtari e
kësaj famullie të re, plot gjallëri ”. Më pas Ati i Shenjtë theksoi në mënyrë
të posaçme vëmendjen që duhet treguar për familjet, posaçërisht për ata, që jetojnë
në varfëri, që përballojnë kushte shqetësuese, ose të parregullta: “Mos i lini
vetëm; qëndroni pranë tyre me dashuri, duke i ndihmuar ta kuptojnë planin e vërtetë
të Hyjit për martesën e familjen”.Në përfundim Papa i drejtoi një përshëndetje
të posaçme të rinjve, në duart e të cilëve janë e sotmja dhe e ardhmja e bashkësisë
kishtare e civile. “Kisha – u tha Benedikti XVI – pret shumë nga entuziazmi juaj,
nga aftësia juaj për të shikuar përpara e nga dëshira për të ecur me vendosmëri në
rrugët më të drejta e më të ndritura të jetës”.