Me 20 mars, e diel, Kisha kremton të Dielën e Dytë të Kreshmëve e po këtë ditë
më 20 mars, kalendari liturgjik kujton edhe festën e Shën Gjon Nepomuçenit dhe Shën
Klaudies. Liturgjia na kujton se Jezusi është gjithnjë i gatshëm ta ndihmojë secilin
prej nesh.Liturgjia e festës së tyre na nxit të meditojmë se largimi i Jezusit në
vende të vetmuara nuk do të thotë se ai i braktisë nxënësit e vet. Vetëm kur Ai është
në barkë bashkë me ta, frika zhduket e barka i afrohet bregut aq të dëshiruar. Të
hënë më 21 mars, kalendari Kishtar përkujton Shën Nikollën nga Flye, Pajtor i
Zvicër. Figura e tij na kujton se Zoti na do deri në atë pikë, sa të na dhurojë të
Birin e vetëm, duke pranuar vdekjen e tij në kryq për të na çliruar ne nga vdekja
e amshuar. Të martën e ardhshme 22 mars, bie përkujtimi i Shën Leas, vejushë
romake dhe Shën Palit, ipeshkëv i Narbonës. Liturgjia e Fjalës së Zotit, na kujton
se të kesh fe, do të thotë t’i besosh Zotit e të lëshohesh plotësisht në dorë të tij,
edhe në çastet e rënda të provës, ashtu si bëri Moisiu. Duhet ta dimë mirë se e keqja
nuk na vjen kurrë nga Zoti, madje ai na rri gjithnjë pranë e nuk na braktis kurrë.
Të mërkurën më 23 mars, bie përkujtimi i Shën Turibit të Mogrovejos, ipeshkëv
i Limës e Shën Rebekes, të cilët na kujtojnë se në këtë shtegtim krezhmor duhet të
ndalohemi dhe një herë e të meditojmë mbi Jezusin e mbi veprat që kreu, për t’i besuar
kështu me gjithë zemër e për t’i lartuar lutjen: “Dëgjoje, o Zot, britmën e njeriut
të varfër, që të lutet!”. Të enjten më 24 mars kalendari kishtar përkujton
Shën Katerinën e Suedisë, virgjër, e bija e Shën Brigjidës, e cila na kujton se të
ndjekësh Krishtin nuk është aspak punë e lehtë: mund të shkaktojë vuajtje të padurueshme,
si ato të Jeremisë profet, të cilat na i kujton liturgjia e festës. Të premten
më 25 mars, do të kremtojë Lajmërimin e Zotit. Solemniteti na kujton përgjigjen
që i dha Virgjëra Mari Kryeengjëllit Gabriel: “Qe shërbëtorja e Tënzot, u bëftë mbi
mua si është fjala jote”. Edhe sot, si atëherë, Zoti nuk e detyron askënd të ndjekë
rrugën e Tij. Zoti na fton, nuk na detyron. Na përket ne t’i japim atë përgjigje që
i dha Maria. Gjithnjë të premten më 25 mars kalendari përkujton edhe Shën
Hajdutin e Mirë, Shën Kuirinin martir e Shën Luçia Filipinin, virgjër, themeluese
e mësueseve të përshpirtshme Filipini, prej vitesh me mision në Shqipëri, sidomos
në Berat. Të shtunën që vjen më 26 mars kalendari kishtar përkujton shën
Kastullin, martir. Në liturgjinë e ditës jehon fuqimisht britma e mëkatarit të penduar
drejtuar Zotit: “Dëgjoje, o Zot, të varfërin që të lutet!”. Të dielën e ardhshme
më 27 mars, Kisha do të kremtojë të dielën e Tretë të Kreshmëve e po më 27 mars
bie edhe përkujtimi i Shën Rupertit, ipeshkëv i Salcburgut, na kujton se edhe ne nganjëherë
ndjehemi të lodhur e të shkurajuar, si populli hebraik në shktetëtirë, sepse kemi
pak besim në shpëtimin që vjen nga Zoti në Jezu Krishtin.