Мінск: арцыбіскуп Чэллі раставіць кропкі над “і” адносна СМІ
Неабходнасць пашырэння
выкарыстання сучасных сродкаў масавай камунікацыі ў Касцёле ў мэтах евангелізацыі
– вельмі часта мы чуем такі заклік і заахвочванне з розных крыніц. Часам гэта тэма
пакідае за сабою шмат пытанняў, але ў той жа час выклікае вялікую цікавасць у розных
колах. Каб раставіць усе кропкі над “і”у гэтым пытанні і падзяліцца досведам працы
Касцёла ў гэтай сферы, у Беларусь быў запрошаны старшыня Папскай рады па сродках масавай
камунікацыі арцыбіскуп Клаўдыё Марыя Чэллі, які будзе знаходзіцца з візітам у нашай
краіне ў маі бягучага года.
Па словах Мітрапаліта Мінска-Магілёўскага арцыбіскупа
Тадэвуша Кандрусевіча ідэя аб неоабходнасці такога візіту ўзнікла падчас наведвання
Папскай рады па сродках массавай камунікацыі ў 2009 годзе падчас візіту “аd limina”
біскупаў Беларусі ў Ватыкан. Менавіта тады вельмі ясна прагучаў з вуснаў арцыбіскупа
Чэллі заклік да больш дынамічнага выкарыстання мас-медыя ў евангелізацыі. Мітрапаліт
Тадэвуш Кандрусевіч расказаў, што “восенню мінулага года падчас майго ўдзелу ў пасяджэнні
Папскай рады “Iustitia et pax”, я адведаў некалькі кангрэгацый, між іншым і арцыбіскупа
Чэллі, і асцярожна спытаў яго, ці не мог бы ён прыехаць калісці ў Мінск, у Беларусь,
каб спаткацца са святарамі, прадстаўнікамі мас-медыя – ён адразу прыняў запрашэнне.”
Анансаваны візіт выклікаў вялікую цікавасць у Беларусі: “Спачатку планавалася,
што гэта будзе спатканне з каталіцкімі масс-медыя, святарамі, законнікамі і законніцамі,
бо ад іх вельмі моцна залежыць спосаб выкарыстання мас-медыя ў нашым душпастырстве.
Навіна пра візіт прайшла ў беларускіх СМІ і да мяне звярнуліся прадстаўнікі іншых
канфесій, а таксама свецкіх мас-медыя” – сказаў Мітрапаліт. Такім чынам было вырашана
ўнесці змены ў праграму візіту, якія дазволяць ўсім зацікаўленым прыняць удзел у сустрэчы
з ватыканскім іерархам.
Форум пройдзе ў Чырвоным касцёле 13 мая і будзе падзелены
на два тэматычныя блокі. Першы з іх – арыентаваны на прадстаўнікоў свецкіх СМІ, будзе
мець назву “Этыка ў сучасных мас-медыя.” Другі, з удзелам святароў і прадстаўнікоў
рэлігійных СМІ, будзе накіраваны на заахвочванне і дзяленне досведам выкарыстання
мас-медыя.
“Я спадзяюся, што гэты візіт будзе вельмі важным асабліва для інтэнсіфікацыі
выкарыстання мас-медыя ў пастырскай дзейнасці”- адзначыў арцыбіскуп Кандрусевіч. У
дні прабывання госця ў Беларусі запланавана таксама св. Імша ў Нясвіжы, 14 мая. Завершыцца
візіт Эўхарыстыяй ў мінскай архікатэдры 15 мая.