Հայաստան Կ՛ողջունէ ՄԻՆՍՔ-Ի Խմբակի Նախագահներուն Նախաձեռնութիւնը ։
Արձագանգելով ԵԱՀԿ-ի Մինսքի խմբակի համանախագահներուն տարածած յայտարարութեան` Հայաստանի
արտաքին գործոց նախարարութեան մամլոյ քարտուղար Տիգրան Բալայեան յայտնեց, որ շփման գիծէն
արձակազէններու դուրս բերումը թոյլ պիտի տայ խուսափելու միջադէպերէն եւ բարենպաստ մթնոլորտ
ստեղծելու տագնապի լուծման հոլովոյթին մէջ: Իրենց յայտարարութեան մէջ ԵԱՀԿ-ի Մինսքի
խմբակի համանախագահները խոր մտահոգութիւն յայտնած էին 5 մարտին Սոչիի մէջ տեղի ունեցած
եռակողմանի բանակցութիւններէն առաջ եւ ետք Լեռնային Ղարաբաղի տագնապի շփման գիծին վրայ
զինադադարի դրութեան խախտումներուն մասին հաղորդումներուն գծով: Միջնորդները նշած
էին, որ իրենք խնդրած են ԵԱՀԿևի նախագահի անձնական ներկայացուցիչ, դեսպան Անճէյ Քասփրչիքէն
հետաքննութիւն կատարել բոլոր կողմերուն մասնակցութեամբ եւ տեղեկացուցած էին, որ յառաջիկայ
շաբաթ պիտի մեկնին շրջան` կոչ ուղղելու կողմերուն լիարժէքօրէն մասնակցելու տեղի ունենալիք
հետաքննութեան: Տիգրան Բալայեան նշեց, որ իրենք կ՛ողջունեն ԵԱՀԿ-ի Մինսքի խմբակի համանախագահներուն
այս նախաձեռնութիւնը: «Հայաստանը եւ Ղարաբաղը բազմիցս դրական արձագանգած են ՄԱԿ-ի
ընդհանուր քարտուղարի, ԵԱՀԿ-ի Մինսքի խմբակի համանախագահներու, ԵԱՀԿ-ի գործող նախագահներու
կոչերուն` շփման գիծէն արձակազէններու դուրս բերման վերաբերեալ, ինչ որ թոյլ կու տայ
խուսափիլ նմանատիպ միջադէպերէ եւ բարենպաստ մթնոլորտ ստեղծել տագնապին լուծման հոլովոյթին
մէջ», ընդգծեց Բալայեան: