Kuvendi i Kosovës miraton rezolutën për dialogun me Serbisë, pa vota të opozitës.
Kuvendi i Kosovës me 63 vota për, 48 kundër dhe 1 abstenim miratoi rezolutën e propozuar
nga grupi parlamentar i partisë Demokratike të Kosovës lidhur me bisedimet me Serbinë.
Adem Grabovci, shef i Grupit parlamentar të PDK-së tha se megjithëse janë inkorporuar
ndryshimet në rezolutë të kërkuara nga partitë opozitare, gjegjësisht nga Lidhja Demokratike
e Kosovës, Vetëvendosje dhe nga Aleanca për Ardhmërinë e Kosovës shefat e Grupeve
parlamentare të këtyre partive nuk e kanë nënshkruar këtë rezolutë. Grabovci nga
Grupi parlamentar i PDK-së, tha se kjo parti e përkrah rezolutën e cila i jep të drejtë
Kuvendit të Kosovës të kërkojë sqarime qeverisë lidhur me bisedimet në çdo kohë, si
dhe të mbikëqyrë bisedimet me Serbinë. Derisa deputeti i AAK-së, Daut Haradinaj
e cilësoi këtë dialog të dëmshëm për Kosovën, Visar Ymeri nga Vetëvendosje u pozicionua
kundër bisedimeve. Ndërkaq, Grupi parlamentar i LDK-së nuk e ka mbështetur rezolutën,
pasi që në tekstin e saj nuk janë përfshi propozimet e kësaj partie politike. Rezoluta
sipas pozitës do t'i japë një rol shtesë Kuvendit në mbikëqyrjen e procesit të filluar
të bisedimeve ndërmjet Qeverisë së Kosovës dhe asaj të Serbisë. Rezoluta përcakton
“vijat e kuqe” për çka nuk duhet të bisedohet me Serbinë, dhe që Qeveria do të duhet
t’i raportojë Kuvendit për rezultatet e bisedimeve, ose marrëveshjet eventuale. Megjithëse
partitë opozitare nuk e mbështeten rezolutën e debatuar në Kuvendin e Kosovës, rezoluta
u aprovua me 63 për, 48 kundër dhe 1 abstenim. (Telegrafi)