Пратэсты супраць праяваў
хрысціянафобіі прайшлі ў цэнтры харвацкага Заграба. Прычынай сталі ўсё больш частыя
нападкі СМІ на Каталіцкі Касцёл, паведамляе выданне “Каталіцкі аглядальнік”. Непасрэдным
штуршком да гэтых пратэстаў стаў судовы працэс, які пачаўся ў Заграбе над каталіцкай
настаўніцай катэхізіса Аленай Мудровчіч, якую спрабуюць абвінаваціць у гамафобных
выказваннях.
Судовы пазоў у загрэбскі суд падало лесбійскае таварыства “Kontra”,
пасля таго, як іх папярэдні пазоў быў адхілены, як неабгрунтаваны, судом ніжэйшай
інстанцыі. У новым пазове арганізацыя выкарыстоўвае пункты кантраверсійнага харвацкага
закона аб гамафобіі. Паводле заяў прадстаўнікоў “Kontra”, яны спрабуюць асудзіць не
настаўнікі катэхізіса, а маральную навуку Каталіцкага Касцёла адносна гомасексуальнасці.
Такія паводзіны лесбійскай арганізацыі выклікаюць асцярогу, што і ў Харватыі
магчымыя праявы хрысціянафобіі. “Мы патрабуем, каб наша грамадства прызнала, што хрысціянафобія
існуе, гэтак жа, як існуе антысемітызм, ісламафобія, расізм. Мы таксама патрабуем,
каб дзяржава прыняла папраўкі ў закон аб дыскрымінацыі. Бо дадзеным законам абаронены
усе акрамя хрысціян-католікаў”, - заявіў адзін з арганізатараў акцыі Крэшымір Мілеціч,
прэзідэнт Таварыства распаўсюджвання сямейных каштоўнасцяў.
Як мяркуюць арганізатары,
акцыя павінна стаць першай у шэрагу мерапрыемстваў і першым крокам у барацьбе з праявамі
католікафобіі і хрысціянафобіі ў харвацкім грамадстве.