Papa ia kushtoi audiencën e përgjithshme Kreshmëve, duke kujtuar se agjërim do të
thotë të heqësh dorë nga e keqja; lëmoshë, të bësh mirë!
(09.03.2011 RV)Lutje e kthim i zemrës, me shenjat pendestare të agjërimit e
të lëmoshës, për t’i dhënë kuptim rrugës, që fillon i krishteri të Mërkurën e Përhime,
duke ecur në gjurmët e Krishtit, i cili niset kah Jeruzalemi, për të kryer misionin
e tij tokësor. Mbi këto koncepte e përqendroi Benedikti XVI katekizmin e audiencës
së sotme të përgjithshme, mbajtur në Sallën e Palit VI, në Vatikan, kushtuar Kreshmëve.
Në këtë të Mërkure të Përhime, Benedikti XVI i nxiti të gjithë besimtarët të hyjnë
në Kohën e Kreshmëve, duke marrë çdo ditë kryqin e vet mbi shpinë e duke ndjekur pas
Jezusin, drejt Kalvarit!
Kreshmët janë rrugëtim në gjurmët e Jezusit, që ngjitet
në Jeruzalem, vend ku do të përmbushë misterin e mundimeve, të vdekjes e të ringjalljes.
Kjo rrugë feje – nënvizoi Benedikti XVI – na kujton se jeta e krishterë është udhë,
që duhet përshkuar, e jo ligj që duhet zbatuar. E në këtë udhë ecim pas vetë Jezu
Krishtit, që të mund ta takojmë, ta pranojmë, ta ndjekim. Jezusi vijon të na bëjë
thirrje: “Në se ndokush dëshiron të vijë pas meje, të mohojë vetveten, të marrë kryqin
e vet çdo ditë e të më ndjekë”: “Kisha e di se për shkak të ligështive tona,
e kemi vështirë të heshtim e të gjunjëzohemi para Zotit, me vetëdijen e krijesave,
që varen prej Tij, e të mëkatarëve, që kanë nevojë për dashurinë e Tij. Prandaj Kreshmët
na ftojnë ta bëjmë lutjen tonë më besnike, më të thellë e ta meditojmë më gjatë Fjalën
e Zotit”. Është sidomos liturgjia - kujtoi Papa- ajo që na ndihmon të ecim
në këtë udhë me Zotin, në gjurmët e ngjarjeve të shëlbimit tonë. Por jo si përkujtim
i thjeshtë, si kujtim i ngjarjeve të së kaluarës, sepse në sjelljet liturgjike këto
ngjarje shëlbuese bëhen aktuale: “Të marrësh pjesë në liturgji, atëhere,
do të thotë ta zhytësh jetën tënde në misterin e Krishtit, të përshkosh një rrugë,
përmes së cilës hyn në vdekjen e në ringjalljen e Tij, për të pasur jetë”. Kështu
u shpreh Ati i Shenjtë, duke kujtuar, më pas, lidhjen e veçantë të Kohës kreshmore
me Pagëzimin, përmes të cilit njeriu, i vdekur për mëkatin, bëhet pjesëtar i jetës
së re në Krishtin e Ringjallur. Më pas, ftesa për t’u përgatitur sa më mirë, që t’i
kremtojmë denjësisht misteret e Pashkëve, duke vënë në jetë praktikat tradicionale:
agjërimin, lëmoshën, lutjen. Të agjërosh nuk do të thotë vetëm të jesh i përkorë
në të ngrënë, por sidomos, të jesh i përkorë në forma të tjera. Nuk është, pra, fjala
vetëm për ushqimin, por edhe, e kryesisht, për një jetë më të thjeshtë, parë si simbol
i jashtëm i realitetit të brendshëm, shpirtëror, i impenjimit tonë që, me ndihmë të
Zotit, të heqim dorë nga e keqja e ta jetojmë plotësisht Ungjillin. Lëmosha është
e nevojshme jo vetëm për të pasurit e të kamurit, por edhe për ata, që jetojnë në
kushte modeste, madje edhe në varfëri, në mënyrë që, duke qenë të pabarabartë në pasuri
e në fatbardhësi, të jenë të gjithë të barabartë në mëshirë e në dashuri të krishterë. Nuk
duhet harruar lutja, pastaj. E e thënë me përvujtëri e përshpirtëri, në sa agjërojmë
e japim lëmoshë, në sa jetojmë thjesht, i falim fajtorët tanë e ua kthejmë të keqen
me të mirë e jo me të keqe: “Të dashur miq, në këtë rrugë kreshmore,
duhet të jemi gati ta pranojmë ftesën e Krishtit për ta ndjekur me vendomëri e pa
asnjë lëkundje, duke përtërirë hirin dhe impenjimet e Pagëzimit tonë; ftesën për të
hequr dorë nga njeriu i vjetër, që e kemi në shpirt, e për t’u riveshur me Krishtin,
duke arritur të përtërirë në ditën e Pashkëve. E kështu do të mund të themi, së bashku
me Shën Palin “Nuk jam më unë që jetoj, por është Krishti, që jeton në mua. Udhë
të mbarë kreshmore, të gjithëve!”.