Edhe Organizata e Konferencës Islamike iu bashkua thirrjeve Ndërkombëtare për vendosjen
e zonës së ndalim-fluturimit mbi Libi, si përgjigje ndaj sulmeve ajrore të forcave
besnike të Moamer Gadafit kundër pozicioneve të kryengritësve. "Ne i bëjmë thirrje
Këshillit të Sigurimit që ta bëjë detyrën e vet", tha sekretari i përgjithshëm i OKI-së,
Ekmeledin Ihsanogllu, në hapje të samitit të jashtëzakonshëm të organizatës 57 anëtarëshe
në Xheda të Arabisë Saudite. Shtyhet për të shtunën mbledhja e emergjencës e ministrave
të Jashtëm të Vendeve të Lidhjes Arabe, e parashikuar për këtë të premte në Kajro.
Kështu njoftoi zëvendëssekretari i Lidhjes, Ahmed Hilli. Shtyrja është bërë me kërkesën
e disa ministrave. Franca e Britania kanë kërkuar autorizimin e Kombeve të Bashkuara
për zonë të ndalim-fluturimit mbi Libi. Sekretari i përgjithshëm i NATO-s, Anders
Fogh Rasmusen, gjithashtu, e ka theksuar autorizimin nga Kombet e Bashkuara. Ministri
i Jashtëm i Rusisë, Sergei Lavrov, është shpreh kundër ndërhyrjeve ushtarake duke
shtuar se libianët "duhet vetë t'i zgjidhin problemet e tyre".