Shqipëri: Berisha paraqet programin elektoral të PD-së e fton PS-në të zbatojë òigjet
e procedurat konsensuale
Kryeministri Shqipërisë Sali Berisha deklaroi sot, se "programi elektoral i Partisë
Demokratike për zgjedhjet lokale të 8 majit, do të ketë në qendër qytetarin dhe zhvillimin
e komunitetit", ndërsa ftoi Kryetarin e Partisë Socialiste, Edi Rama që "të zbatojë
ligjet dhe procedurat konsensuale". Në mbledhjen e grupit parlamentar të PD-së,
Berisha u shpreh se fushata elektorale e cila ka nisur "de facto", ka në qendër qytetarin
dhe problematikën e tij. "Kjo është politika më e mirë në këtë fushatë elektorale.
Ne kemi në qendër të programit politik shkollat, rrugët, kanalizimet, rrugicat, gjelbërimin,
pastrimin dhe potencialet zhvillimore të komuniteteve", tha Berisha. Duke kërkuar
angazhimin total të deputetëve dhe strukturave të PD-së për zgjedhjet lokale, ai tha
se "projekti vendimtar i kësaj maxhorance është Shqipëria e zhvilluar". Sipas Berishës,
"nuk mund të ketë Shqipëri të zhvilluar pa zhvillim të qëndrueshëm rural", ndaj theksoi
se, nuk do të braktiset asnjë zonë e vendit, përkundrazi do të përparësohen të gjitha
problemtikat e çdo komuniteti. "Në rast se në disa rrethe, për qëllime të caktuara
kemi bërë edhe investime më të mëdha që kanë qenë plotësisht të justifikuara si investimet
në ultësirën bregdetare, ky ka qenë interesi i gjithë shqiptarëve dhe kjo nuk është
bërë për t'i kthyer shpinën zonave malore", tha Berisha, që premtoi se, "zonat malore
do të jenë në qendër të investimeve të ardhshme të qeverisë". Kreu i Qeverisë garantoi
se "në zgjedhjet e 8 majit, çdo qytetar shqiptar do të votojë me infrastrukturën më
moderne" dhe se "do respektohet plotësisht vota dhe vullneti i tyre". Berisha ftoi
Edi Ramën që të lexojë mesazhet e qytetarëve shqiptarë dhe të miqve të Shqipërisë
në Europë dhe botë, të cilat i konsiderojnë zgjedhjet lokale, si një provë për qëndrimin
ndaj lirisë të forcave politike shqiptare. "Ftoj Edi Ramën të zbatojë ligjet dhe
procedurat që janë votuar në mënyrë konsuesuale në parlamentin shqiptar", tha Berisha.