Shën Pelini, shenjti nga Durrësi, u vendos në kishën e martirëve në Blinisht të Shqipërisë
Pasi u bekuan në Avecano të Italisë, busti, me reliken e Shën Pelinit, shenjt shqiptar
i lindur në Durrës, u dërguan në dioqezën e Sapës në Shqipëri, të shoqëruara nga një
delegacion kishtar, i cili qëndroi në vend nga data 3 deri më sot, 6 mars. Në delegacion,
përveç ipeshkvijve të Avecanos e të Sulmonës, bënte pjesë edhe don Antonio Sharra,
që ka qenë misionar “Fidei Donum” në Blinisht e një grup nga shoqata “Rindërtimi”
e Avecanos, gjithnjë në vijën e parë të frontit për të ndihmuar banorët e Zadrimës. Aktivitetet
kryesore për t’ia kthyer këtë shenjt Shqipërisë u bënë të shtunën, pra gjatë ditës
së djeshme në Blinisht, ku do të qëndrojë edhe shën Pelini në kishën kushtuar shenjtorëve
dhe martirëve shqiptarë. Busti prej druri dhe reliket u vendosën në këtë kishë, pikërisht
kur u përkujtua martirizimi i birit të Blinishtit, atë Daniel Dajanit nga komunistët,
më 4 mars 1946, së bashku me atë Gjovani Faustin, atë Gjon Shllakun e seminaristin
Mark Çuni. Të premten, në praninë e bustit dhe të relikeve të shenjtit, u kremtua
mesha në katedralen e Vaut të Dejës, ku homelinë e rastit e mbajti ipeshkvi i Sapës,
imzot Lucian Avgustini. Mes të tjerash, imzot Avgustini tha: “Urojmë, që shenjti
me prejardhje nga Durrësi, shën Pelini si dhe martirët tanë që sot po i kujtojmë në
ditën e tyre të pushkatimit të ndërmjetësojnë pranë Hyjit për vendin dhe popullin
tonë, posaçërisht që t’u shndrisë mendjen të gjithë atyre, që e kanë për detyrë dhe
përgjegjësi të angazhohen për të mirën dhe mirëqenien e vendit dhe popullit që të
punojnë me dashuri dhe drejtësi”. Kujtojmë se janë pikërisht dy profesorë të
dioqezës së Marsikës në Itali, ata që kanë zbuluar se shën Pelini, emrin e të cilit
e mban një fshat abrucez, ka lindur në Durrës, por pasi ka qenë ipeshkëv i Brindizit,
është martirizuar në Korfinio të Abrucos, në kohën e Julianit apostat.