Atë Lombardi: Myslimani e i krishteri në dhimbjen e bashkëkombasve të tyre në Pakistan
Papa shprehu të enjten dhimbjen e tij të thellë për vrasjen e ministrit pakistanez
për Pakicat fetare, Shahbaz Bati, të mërkurën e kaluar. Përmes një telegrami të nënshkruar
nga kardinali-sekretar i shtetit, Tarçizio Bertone, dërguar kryetarit të Konferencës
Ipeshkvnore Pakistaneze, imzot Lourenc Saldanha, Benedikti XVI bën ngushëllimet e
rastit e lutet për ministrin Bati, që u vra nga fondamentalistët islamikë në Islamabad. Bashkësia
e krishterë e Pakistanit doli këto ditë në manifestime spontane e u lut së bashku
me shumë myslimanë, që deshën të merrnin pjesë në dhimbjen e bashkëkombasve të tyre.
Vendi ishte në zi për tri ditë, nga e premtja e deri më sot. Në Islamabad u organizuan
procesione me qirinj, me lutje e këngë të përshpirtshme. Të premten, trupi pa
jetë i ministrit u çua në kishën e Zojës së Fatimës në kryeqytetin pakistanez, ku
ipeshkvi, imzot Antoni Rafin kremtoi Meshën e dritës. Pastaj, bashkësia e krishterë
u mblodh në Kushphur, fshati katolik ku ishte lindur Shahbaz Bati e ku u kremtua edhe
funerali, i kryesuar nga ipeshkvi i Faisalabadit, imzot Jozef Kuts. Vdekja e ministrit
pakistanez Shahbaz Bati erdhi pas vrasjes edhe të guvernatorit të Panxhabit, për të
njëjtin shkak. Të dy punonin për ndryshimin e ligjit mbi blasfeminë dhe për mospërdorimin
e tij kundër të pafajshmëve. Të dëgjojmë komentin javor të zëdhënësit të Vatikanit,
atë Federiko Lombardi, që i kushtohet pikërisht këtyre ngjarjeve: “Që të dy
u vranë për të njëjtën arsye: sepse ishin kundër ligjit mbi blasfeminë, një ligj që
është ai vetë vërtet blasfem, pasi në emër të Zotit bëhet shkak padrejtësish e vdekjesh.
Por njëri ishte msyliman, Salman Taseer, guvernator i Panxhabit; tjetri i krishterë,
Shahbaz Bhatti, ministër për pakicat fetare në qeverinë pakistaneze. Që të dy e dinin
mirë se vinin në rrezik jetën, pasi ishin kërcënuar qartë me vdekje. E megjithatë,
nuk hoqën dorë nga lufta për lirinë fetare, kundër fanatizmit të dhunshëm, duke e
paguar këtë me çmimin më të lartë, me gjakun e tyre. Në fjalimin e tij
të rëndësishëm mbi lirinë e fesë, para Trupit Diplomatik në janar, Papa u shpreh me
nderim të madh për flijimin e guximshëm të myslimanit Taseer. E pak javë më parë,
Bhati pati thënë: “Lutuni për mua. Jam një njeri që lë pas tokë të djegur: nuk mund
e nuk dua të kthehem mbrapsht. Do të luftoj ekstremizmin e do të përpiqem për mbrojtjen
e të krishterëve deri në vdekje”. Që tani, figura e tij madhërohet si ajo e një dëshmitari
me vlerë të fesë dhe të drejtësisë. Ndërsa dy vrasësit na mbushin zemrën
me tmerr e ankth për fatin e të krishterëve të Pakistanit, njëkohësisht, në mënyrë
paradoksale, na zgjojnë edhe pak shpresë, pasi bashkojnë një mysliman e një të krishterë
përmes gjakut të derdhur për të njëjtën kauzë. Nuk ekziston më vetëm dialogu për njohjen
e ndërsjelltë, ose dialogu në impenjimin e përbashkët për të mirën e njerëzve. Nga
dialogu i jetës kalohet në dialogun e dëshmisë së vdekjes, paguar me gjak, që emri
i Zotit të mos kthehet në mjet padrejtësie. Duke kujtuar guvernatorin Taseer
dhe ministrin Bhati, me mirënjohje të thellë për si kanë jetuar e kanë vdekur, adhuruesit
e vërtetë të Zotit do të vazhdojnë të luftojnë – e nëse është e nevojshme, edhe të
vdesin – për lirinë e fesë, për drejtësinë e për paqen. A mund të kërkojmë një inkurajim
më të madh se ky për rrugën tonë të përbashkët drejt takimit ndërfetar të Asizit?”