Сённяшняя штотыднёвая
рубрыка дырэктара Ватыканскага радыё кс. Фэдэрыко Ламбардзі называецца “Мусульманін
і хрысціянін”. Яна прысвечана Сальману Тасіру, губернатару пакістанскай правінцыі
Пенджаб, і Шахбазу Бхаті, міністру па справах меншасцяў Пакістана.
“Абодва
былі забіты з адной і той жа прычыны: таму што супрацьстаялі закону аб блюзнерстве.
Закону, які сам па сабе з’яўляецца блюзнерствам, бо згодна з ім імя Бога становіцца
прычынай несправядлівасці і смерці”, - піша кс. Ламбардзі. “Адзін з гэтых забітых
быў мусульманінам, а другі хрысціянінам. Яна абодва добра ведалі, што рызыкуюць уласным
жыццём, бо атрымлівалі шматлікія пагрозы аб пакаранні смерцю. Аднак, яны не спынілі
сваю барацьбу за рэлігійную свабоду, супраць рэлігійнага фанатызму і заплацілі самым
дарагім – уласнай крывёю”, - адзначае дырэктар Ватыканскага радыё.
Кс. Ламбардзі
нагадвае, што ў студзені 2011 г., Святы Айцец, казаў аб рэлігійнай свабодзе, выступаючы
перад прадстаўнікамі дыпламатычнага корпусу, акрэдытаванымі пры Апостальскай Сталіцы.
У той прамове Пантыфік адзначыў каштоўнасць гераічнай ахвяры мусульманіна Тасіра.
Некалькі
тыдняў таму Бхаті казаў: “Маліцеся за мяне. Я чалавек, які спаліў усе масты за сабой.
Я не магу і не хачу адступаць. Я буду змагацца з экстрэмізмам дзеля абароны хрысціянаў
аж да смерці”. “Сёння яго постаць ужо ўзвышаецца, як прыклад і сведчанне веры і справядлівасці”,
- адзначыў кс.Ламбардзі.
“Неглядзячы на тое, што забойствы гэтых людзей прынеслі
страх для многіх хрысціянаў, у той жа час, яны становяцца крыніцай надзеі, таму што
злучаюць кроўю мусульманаў і хрысціянаў перад адной праблемай. Гэта ўжо не проста
дыялог аб сумесных дзеяннях дзеля дабра людзей. Гэта сведчанне смерцю, коштам уласнай
крыві, каб імя Бога не стала прыладай несправядлівасці”, - гаворыць кс.Ламбардзі.
Напрыканцы
свайго разважання дырэктар Ватыканскага радыё звяртаецца з заклікам: “У памяць аб
Тасіру і Бхаті, з удзячнасці за іх жыццё і смерць, сапраўдныя вернікі працягнуць змагацца,
а калі трэба і паміраць, за рэлігійную свабоду, за справядлівасць і за мір. Які прыклад
можа быць больш натхняючым, каб ісці разам да Асізі?”