ՔԱՇԱԹԱՂԻ 600 ԸՆՏԱՆԻՔՆԵՐ ՆԻՒԹԱԿԱՆ ՓՈԽԱՏՈՒՈՒԹԻՒՆՆԵՐ ՊԻՏԻ ՍՏԱՆԱՆ ։
Արցախի պետութեան կողմէ Քաշաթաղի վերաբնակեցման եւ ազատագրուած տարածքներուն մէջ գիւղատնտեսութեան
զարգացման նպատակներուն սատարող «Արցախ Ռուց Ինվեսթմընց» (ԱՐԻ) ընկերութիւնը, որ հիմնուած
է ներդրումներ կատարելու Քաշաթաղի վերաբնակեցման աշխատանքին մէջ, արձանագրած է հսկայ
յաջողութիւն մը, որուն հիման վրայ կարելի պիտի ըլլայ նիւթական փոխատուութիւններ ապահովել
Քաշաթաղի բնակչութեան մաս կազմող 600 ընտանիքներուն: ԱՐԻ ընկերութիւնը, որ սեղմ ջանքերով
կրցած է իբրեւ սկզբնական աշխատանք 16 ներդրողներով 100 ընտանիքներու վարկեր ապահովել,
նախորդ քանի մը օրերուն ընթացքին իր կազմակերպած աշխատանքային հանդիպումներուն ընթացքին
կրցած է ներդրումներու գումարը հասցնել շուրջ 2 միլիոն տոլարի, որով կարելի պիտի ըլլայ
նաեւ 500 ընտանիքներու վարկ տրամադրել: ԱՐԻ-ի ներդրող անդամներուն թիւը բարձրացնելու
նպատակով, ընկերութիւնը Լիբանան հրաւիրեց Արցախի վարչապետ Արա Յարութիւնեանը, որ ԱՐԻ-ի
անդամներուն հետ գործակցաբար հանդիպումներ ունեցաւ լիբանանահայ գործարարներու հետ: Հանդիպումներուն
ընթացքին կարելի եղաւ ընդարձակել լիբանանահայ ներդրողներուն թիւը, որուն շնորհիւ վարկերու
կարիքը ունեցող Քաշաթաղի երկու հազար հինգ հարիւր բնակիչներէն վեց հարիւրին կարելի պիտի
ըլլայ տրամադրել նիւթական փոխատուութիւններ` ի խնդիր Արցախի եւ յատկապէս ազատագրուած
տարածքներու գիւղատնտեսութեան զարգացման: