Sot, funerali i ministrit pakistanez Bati, vra nga fondamentalistët islamikë
(04.03.2011 RV)Bashkësia e krishterë e Pakistanit përjetoi sot një ditë lutjeje
e bashkimi për funeralin e ministrit katolik për Pakicat Fetare, Shahbaz Bati, vrarë
të mërkurën e kaluar, në Islamabad, nga fondamentalistët islamikë. Ceremonia u kremtua
në fshatin katolik të Kushphurit dhe u kryesua nga ipeshkvi i Faisalabadit, imzot
Jozef Kuts.
“Zëri i së vërtetës nuk do të heshtë kurrë. Nuk do të lejojmë,
që errësira të ngadhnjejë mbi dritën”: qenë disa nga fjalët, që tha ipeshkvi gjatë
funeralit, ku ishte i pranishëm edhe një delegacion nga Bashkësia e Shën Egjidit,
me të cilën ministri i ndjerë ka punuar shumë.
Sot paradite, trupi pa jetë
i Shahbaz Batit u vendos në kishën e Zojës së Fatimës në Islamabad. Gjatë Meshës së
Dritës, ipeshkvi i kryeqytetit pakistanez, imzot Antoni Rafin kujtoi fenë e thellë
të ministrit. “Ishte një njeri që bëri vullnetin e Zotit, me fe, me bindje, me shpresë
e i sigurtë në Mbretërinë e Hyjit”, tha ipeshkvi.