Մայր Աթոռում գումարուած ամենամեայ Քահանայից հաւաքը
հանդէս եկաւ յայտարարութեամբ

Ս Ղեւոնդեանց քահանայից տօնի առիթով փետրուարի 28-ին եւ մարտի 1-ին, Մայր Աթոռ Ս Էջմիածնում գումարուեց ամենամեայ քահանայից հաւաքը, որին մասնակցեցին շուրջ երկու հարիւր յիսուն եկեղեցականներ Հայաստանի եւ Արցախի թեմերից։ Հաւաքի քննարկման նիւթն էր Ընտանիքը եւ հոգեւոր հովիւը։ Հաւարտ քննարկումների հոգեւորականաց դասը հանդէս եկաւ յայտարարութեամբ՝`՝`
Մենք ''Հայաստանեայց Առաքելական Ս Եկեղեցու հոգեւոր սպասաւորներս, քննութեան առնելով հայ ընտանիքի առջեւ ծառացած մարտահրաւէրները, կարեւորութեամբ ընդգծում ենք հայրենի պետութեան եւ հասարակութեան կեանքում ընտանիքի բացառիկ արժէքը եւ ազգապահպան առաքելութիւնը։ Դարեր շարունակ աստուածադիր ամուսնական միութեան սրբազան պատուիրանը հիմն է եղել հայ աւանդական ընտանիքի'' իբրեւ փոքր եկեղեցու, որին յատուկ է եղել աստուածսիրութիւնն ու հայրենասիրութիւնը, ընտանեկան սրբութիւնն ու հաւատարմութիւնը ազգային, բարոյական ու հոգեւոր արժէքներին։ Այս ամէնը օրհնուել ու նուիրաործուել է Ս Պսակի մեծ խորհրդով եւ այն գիտակցութեամբ, թէ ''Եւ երկուսը մէկ մարմին պիտի լինեն, որ Աստուած միացրեց, մարդը թող չբաժանի''։
Մեր հովուական ծառայութեան ընթացքում, սակայն, ականատեսն ենք հասարակական գիտակցութեան ու վարքի մէջ դրսեւորուող մտահոգիչ երեւոյթների, որոնք նաեւ հետեւանքն են մեզանում հոգեւոր կեանքի ու աւանդական բարոյական արժէքների տկարացման, համաշխարհայնացման ու աշխարհիկացման գործընթացների, սոցիալական ու տնտեսական դժուարութիւնների։ Այսօր հայ ընտանիքի առջեւ ծառացած են բարոյական այնպիսի հիմնախնդիրներ, ինչպիսիք են ամուսնութեան եւ պսակի խորհրդի ընկալման աղճատումը, կողակցի ու ընտանիքի նկատմամբ, զաւակների ազգային-հոգեւոր դաստիարակութեան հանդէպ պատասխանատուութեան անկումը։ Նմանօրինակ մտայնութեան եւ վիճակների անցանկալի հետեւանք են ամուսնական անհաւատարմութիւնը, ընտանեկան բռնութիւնը, յղիութեան արհեստական ընդհատումը եւ այլ մերժելի երեւոյթներ։ Հայ ընտանիքում ընտանեկան բնական կեանքի խաթարման եւ յաճախ ամուսնալուծութեան պատճառ է դառնում դրանից բխող դառն հետեւանքներով նաեւ տարբեր կրօնական կազմակերպութիւնների եւ շարժումների քայքայիչ գործունեութիւնը։
Այս ամէնով մտահոգուած ընդգծում ենք անհրաժեշտութիւնը մեր հովուական ծառայութեան մէջ առաւել գործուն ջանքեր ներդնելու ''ի զօրացումն Եկեղեցու եւ ընտանիքի դարաւոր կապի'' հանապազօրեայ խնամքով, եկեղեցայ-ծիսական արարողութիւններով, նախաամուսնական եւ հետամուսնական շրջանում զույգերի հետ իրականացուող հետեւողական հոգեւոր-խորհրդատուական ծառայութիւններով։
Ամուսնացող զույգերին յորդորում ենք ամուսնութեան նկատմամբ առաւել պատասխանատու մօտեցում ցուցաբերել ''օրինակ ունենալով մեր աստուածապաշտ հայրերին, եւ Ս Պսակի խորհուրդն ընդունել որպէս անշահախնդիր սիրոյ, միմեանց սատարումի եւ հոգատարութեան անքակտելի սուրբ միութիւն։
Այս նկատառումով մեծապէս կարեւորում ենք մեր ողջ հանրութեան ''անհատների, պետական եւ հասարակական կառոյցների, զանգուածային լրատուութեան միջոցների համաործակցութիւնը հայ ընտանիքի աւանդական արժեգհամակարի ամրապնդման եւ ընտանիքի սրբութեան դէմ կատարուող ոտնգձութիւնների կանխարգելման գործում։
Աղօթում ենք Երկնաւոր մեր Տիրոջը Հայրենի մեր երկրի խաղաղ, ապահով ու առաջընթաց կեանքի համար, որպէսզի ապաւինութեամբ առ հարուցեալն Աստուած, ազգային եւ հոգեւոր միաբանութեամբ շարունակենք ջանքեր ներդնել հայ ընտանիքի առջեւ ծառացած խնդիրների լուծմանն ի նպաստ։
Հաւատում ենք, որ կը յաղթահարուեն հասարակական մեր կեանքը յուզող բոլոր տեսակի դժուարութիւնները, եթէ մեզանում գերիշխեն հաւատն առ Աստուած, սէրը եւ վստահութիւնը միմեանց, Հայրենիքի եւ Մայր Եկեղեցու հանդէպ, հաւատարմութիւնը մեր ազգային արժէքներին ու նախնեաց աւանդներին։