Прэм'ер-міністр Турцыі
Рэджэп Таіп Эрдаган заклікаў сваіх суайчыннікаў, якія жывуць у Германіі, імкнуцца
да інтэграцыі ў нямецкае грамадства, аднак пазбягаць асіміляцыі. Ён заявіў аб гэтым
на сустрэчы з прадстаўнікамі турэцкай супольнасці ў нямецкім Дзюсельдорфе.
Па
словах турэцкага лідэра, нямецкія туркі не павінны забывацца аб сваім паходжанні.
Акрамя таго, Эрдаган заклікаў суайчыннікаў у першую чаргу навучаць сваіх дзяцей турэцкай
мове і толькі потым - нямецкай.
Таксама ў сваім выступе Эрдаган надаў увагу
варожым адносінам у нямецкім грамадстве да туркаў і іншых мусульманаў. Паводле яго
слоў, у Германіі, як і ў шэрагу іншых краін Еўропы, назіраецца ксенафобія і ісламафобія.
Пры гэтым негатыўнае стаўленне да мусульманаў прэм'ер Турцыі параўнаў з антысемітызмам,
назваўшы абедзве праявы “злачынствам супраць чалавечнасці”.
Заявы прэм'ера
Турцыі выклікалі незадаволенасць у Берліне. Па дадзеных “The Guardian”, каментуючы
выступ Эрдагана, міністр замежных спраў Германіі Гіда Вестэрвеле звярнуўся да турэцкай
супольнасці з заклікам перш вучыць усё ж не турэцкую, а нямецкую мову.
Туркі
ў Германіі складаюць найбуйнейшую этнічную суполку: яе колькасць складае каля 2,5
мільёнаў чалавек. У апошні год адносіны з імі абвастрыліся з-за кнігі былога члена
праўлення Бундэсбанка Ціло Сарацына, у якой ён падвергнуў жорсткай крытыцы актыўную
міграцыйную палітыку нямецкіх уладаў. Акрамя таго, канцлер краіны Ангела Меркель у
канцы 2010 года выступіла з прамовай, у якой афіцыйна прызнала правал спробы пабудаваць
у ФРГ мультыкультурнае грамадства.