Benedikti XVI: Kisha të mësojë gjuhën e mjeteve të reja të komunikimit, për ta shartuar
Ungjillin në kulturën dixhitale.
Të studiohet me kujdes gjuha e kulturës moderne dixhitale, për ta ndihmuar Kishën
në misionin e saj ungjillëzues e për të përfshirë, në këto mjete të reja shprehëse,
përmbajtjen e fesë së krishterë. Ky është thelbi i fjalimit të Papës Bendikti XVI,
drejtuar sot paradite pjesëmarrësve në mbledhjen plenare të Këshillit të Komunikimeve
Shoqërore, që filloi sot e do të vijojë deri të enjten e ardhshme.
Duke kujtuar
se mjetet e reja të komunikimit po hapin një rrugë të panjohur më parë në fushën e
të mësuarit, të të menduarit e të marrëdhënieve ndërmjet njerëzve, Papa nënvizoi:
“Gjuhët e reja, që zhvillohen në komunikimin dixhital, kërkojnë, ndërmjet tjerash,
aftësi intuitive e emotive, më shumë sesa analitike, duke e drejtuar mendimin dhe
lidhjen me realietin drejt një organizimi tjetër logjik e duke parapëlqyer shpesh
figurën dhe lidhjet hipertekstuale. Dallimi i pastër ndërmjet gjuhës së shkruar e
asaj të folur, pastaj, duket sikur zhduket, në favor të komunikimit të shkruar, që
merr menjëherë formën e komunikimit gojor”. Pa mohuar vlerat e gjuhëve
të reja, Papa tërheq vëmendjen dhe mbi pikat e dobta, mbi rreziqet, që krijon një
situatë e tillë e re në komunikimin njerëzor: “Rreziqet që krijohen,
natyrisht, i kanë të gjithë parasysh: humbja e botës së brendshme, cektësia në lidhjet
ndërmjet njerëzve, zhdukja e ndjeshmërisë, sundimi i opinionit më bindës, mbi dëshirën
për të kërkuar e për të gjetur të vërtetën. E megjithatë, ata janë pasojë e paaftësisë
për ta jetuar plotësisht e vërtetësisht domethënien e së resë. Ja sepse reflektimi
për gjuhët e teknologjive të reja, është vërtet i ngutshëm”. I ngutshëm,
mendon Papa, sepse kultura dixhitale e vë njeriun para sfidave gjithnjë të reja: “Kultura
dixhitale e vë para sfidash të reja aftësinë tonë për të folur e për të dëgjuar një
gjuhë simbolike, që të prin drejt së mbinatyrshmes. Vetë Jezusi, në kumtimin e Mbretërisë,
diti të përdorë elemente të kulturës e të mjedisit të kohës së tij: grigjën, arat,
gostinë, farët e kështu me radhë. Sot jemi të thirrur të zbulojmë, edhe në kulturën
dixhitale, simbolet e metaforat më të gjetura, që mund të na ndihmojnë kur i flasim
njeriut bashkëkohor për Mbretërinë e Hyjit”. Benedikti XVI kujtoi se lidhja
gjithnjë më e ngushtë e njeriut me makinat, qofshin kompjuter a telefonë celularë,
mund të gjejë, në pasurinë shprehëse të fesë dhe në vlerat shpirtërore, një përmasë
edhe më të gjërë, se përmasa e pakufishme, që duket se krijon teknologjia. Synimi
i këtij kontributi - të zhvillohet njëkomunikim vërtet njerëzor: “Larg
çdo entuziazmi të cekët apo skepticizmi, e dimë se Ungjilli është përgjigje që i jepet
thirrjes së vulosur mbi natyrën tonë, si qenie të krijuara sipas shembëlltyrës së
Zotit të bashkimit. Prandaj komunikimi biblik, sipas vullnetit të Zotit, lidhet gjithnjë
me gjuhën e dialogut e të përgjegjësisë, siç na e dëshmojnë, për shembull, figura
e Abrahamit, e Moisiut, e Jobit dhe e profetëve, e kurrë me gjuhën gënjeshtare të
gjarpërit ose me atë të ngacmimit e të dhunës, që pati përdorur Kaini”.