Imzot Karrasko De Paula: bota gjithnjë më agresive kundër jetës njerëzore.
(25.02.2011 RV)“Sfida është tejet serioze. Jetojmë e punojmë në një botë gjithnjë
më agresive, që vijon t’i kundërvihet përherë e më shumë jetës njerëzore. Prej këndej,
misioni ynë në mbrojtje të jetës fiton vlera të reja e, njëkohësisht, kërkon edhe
impenjim të ri”. Me këto fjalë, ipeshkvi Karrasko De Paula, kryetar i Akademisë Papnore
për Jetën, hapi dje punimet e Asamblesë XVII të përgjithshme, në Sallën e vjetër të
Sinodit, në Vatikan. Për imzot Karraskon, emëruar kryetar më 30 qershorin e vitit
të kaluar, ishte hera e parë që kryesonte një mbledhje të përgjithshme të dikasterit.
Në fjalimin e hapjes, duke ecur në gjurmët e paraardhësve, prelati – sipas njoftimit
të L’Osservatore Romano - ripohoi se në qendër të vëmendjes në veprimtarinë e dikasterit
që drejton, nuk është ndonjë koncept abstrakt, e aq më pak ndonjë ideologji. Është
njeriu konkret. Aq sa Akademia për Jetën mund të quhet edhe “Akademia Papnore për
Njeriun”. “Përballë një bote, gjithnjë më agresive kundër jetës e kundër misionit
të kësaj akademie, është detyra jonë të ripohojmë me forcë se njeriu duhet mbrojtur;
e duhet mbrojtur gjatë gjithë jetës, nga lindja, në vdekje, me të gjitha format e
mënyrat e mundshme. E kjo kërkon që ardhmëria të shikohet me sy të rinj. Gjëja e parë
që duhet bërë, është thellimi i veprimtarisë studimore. Jemi të thirrur – shpjegoi
kryetari i Akademisë Papnore – të përballojmë argumente të ndërlikuara, që kërkojnë
kompetenca shkencore, teknike, teknologjike, etike e morale të një cilësie shumë të
lartë. Duhet, prandaj, të jemi të përgatitur për të përballuar çdo vështirësi. Shpesh
edhe dikastere të tjera të Vatikanit na kërkojnë shpjegime të sakta, që lidhen ngushtë
me një problem kaq themelor, siç është ai i jetës dhe i mbrojtjes së saj. Prej këndej,
kemi formuar grupe ndërkombëtare studimi, të përbëra nga specialistët më të njohur
të disiplinave të ndryshme shkencore, për t’i dhënë përgjigje sa më të sakta tematikave,
që duhen përballuar. Dy grupet e para janë marrë me bankat e kordonit kërthizor dhe
me tronditjen fizike e shpirtërore pas abortit. Së shpejti do të fillojë punën grupi
i tretë i studimit. Do të merret – shpjegoi prelati – me shterpësinë dhe mjekimet,
të cilat ndihmojnë për ta kapërceyer këtë situatë, por jo me teknikat mjekësore e
biologjike, që krijojnë kushte për riprodhim jashtë proceseve natyrore. Pra nuk do
të merremi me lindjen e asistuar, e aq më pak, me kufizimin e dëmeve për shëndetin,
që lidhen me procedura të tilla. Ne na intereson të tregojmë rrugët e mundshme alternative.