(23.02.2011 RV)Vazhdon revolta në Libi, e cila është përgjakur tashmë me vdekjen
e mëse 10 mijë vetëve. Dje, kreu i vendit Muhamar Gedafi i foli kombit, duke e nxitur
të mos bashkohet me protestuesit, të cilët i akuzoi se bashkëpunojnë me Perëndimin.
Qeveria e Tripolit mohon bombardimet mbi civilët e madje nuk pranon edhe se është
përdorur forca kundër manifestuesve. Por dëshmitë, që arrijnë në Perëndim sidomos
përmes internetit, flasin për “masakra me përmasa të frikshme”. Video amatorësh dhe
mesazhe vazhdojnë të mbërrijnë, sidomos në rrjetin shoqëror Tuiter. Flasin për “atmosferë
kërcënuese në Tripoli”, e krahasojnë Bengazin, qytetin ku nisën protestat, me kampin
e shfarosjes së Aushvicit, kërkojnë lutje për të gjithë qytetarët e Libisë e “jo vetëm
për të pafajshmit”. Komisioni Evropian, i mbledhur sot, dënoi njëzëri përdorimin e
forcës, ndërsa Këshilli i Sigurimit i OKB-së miratoi dje një rezolutë, ku dënohet
dhuna e këtyre ditëve. Nga Brukseli priten sanksione. Të dëgjojmë presidentin e Qendrës
italiane të Studimeve Ndërkombëtare, Andrea Marxheleti:...... “Është një
revoltë e përgjithshme, e bazuar mbi brezin e të rinjve, që kanë krijuar një vetëdije
kolektive, përmes internetit. Revoltat që kanë ndezur krejt Afrikën e Veriut e Lindjen
e Mesme, deri tani, janë krejtësisht laike. Duhet folur sa më shpejt me përgjegjësit
e rinj, që ata vetë të bëhen garantë për vazhdimësinë e një vale, që s’ka asgjë të
përbashkët me esktremizmin islamik. E përsëris: deri në këtë çast”.