(23.02.2011 RV)Presidenti i Shqipërisë, Bamir Topi u dërgoi sot një letër krerëve
të të gjitha partive, të cilët i akuzon se e mbajnë vendin peng. “Prej disa muajsh
– shkruan presidenti - vendi ynë vijon të jetë peng i kontradiktave politike dhe konfliktualitetit
politik, institucionet përfaqësuese nuk janë tërësisht funksionale dhe imazhi i Shqipërisë
është dëmtuar ndjeshëm në raport me Bashkimin Europian dhe partnerët tanë strategjikë
ndërkombëtarë. Ky zhvillim negativ kulmoi me ngjarjet tragjike të 21 janarit, ku në
rrethana të papranueshme u shënuan akte dhune ndaj institucioneve të shtetit dhe humbën
jetën katër qytetarë”. Bamir Topi kërkon që hetimet për ngjarjet e 21 janarit
të bëhen pa ndërhyrje politike dhe u tërheq vëmendjen partive, duke vënë në dukje
se kriza aktuale është pasojë e mungesës së dialogut dhe e vënies së interesave personale
mbi ato publike dhe institucionale. Duke u kërkuar të kontribuojnë për rivendosjen
e qetësisë e të mirëkuptimit, presidenti i Shqipërisë tregohet i gatshëm të ndihmojë
në zgjidhjen e problemeve, aty ku është e nevojshme, që vendi të ecë si duhet drejt
zgjedhjeve administrative të 8 majit, gur prove për nivelin e demokracisë shqiptare
edhe në sytë e bashkësisë ndërkombëtare.