Koncistori për shenjtërimin e don Guanelës, imzot Konfortit e motrës Rodriguez de
Kastro: do të shpallen Shenjtorë më 23 tetor 2011.
(21.02.2011 RV)Sot paradite, gjatë kremtimit të Orës së gjashtë, Papa mbajti
Koncistorin e zakonshëm publik, kushtuar tri çështjeve të kanonizimit apo të shenjtërimit.
Tre të Lumët, që do të shpallen shenjtorë më 23 tetorin e ardhshëm, janë: imzot
Guido Maria Konforti, themelues i misionarëve Saverianë; rregulltarja spanjolle,
Bonifacia Rodriguez de Kastro, themeluese e Kongregatës së Misionareve, Shërbëtore
të Shën Jozefitdhe don Luigji Guanela. Të tre jetuan ndërmjet shekullit
XIX e XX. “Venerábiles
Fratres, opportunitátem iam sínguli perpendístis Beátos Guidónem Maríam Conforti,
Aloísium Guanella, et Bonifátiam Rodríguez de Castro in Sanctórum número censéndi... “Je ti, o Zot, shpresa ime! Shpresa ime, je, o Zot, qysh prej rinisë!”:
ky fragment i shkëputur nga Psalmi 70, lexuar në Orën e mesme, pëmbledh mrekullisht
mirë, të përbashktën e tre shenjtorëve: besimin e patrandshëm në Zotin!
Regulltarja
spanjolle, themeluese e Kongregatës së Misionareve, Shërbëtore të Shën Jozefit, lindi
në Salamankë, në vitin 1837, në një familje të përvuajtur zejtarësh. Ajo vetë e fitonte
bukën e përditshme duke punuar kordonë. Si kishte fituar një përvojë jashtëzakonisht
të çmuar në këtë fushë, themeloi Kongregatën për mbështetjen e grave punëtore. Projekt
i guximshëm, që u kundërshtua menjëherë nga kleri dioqezan. E përbuzur deri nga simotrat,
nuk iu përgjigj përbuzjes me përbuzje, por vijoi të jetonte në heshtje e harresë të
plotë, duke ia besuar Krishtit vuajtjet e zemrës së lënduar. Vetëm pas vdekjes, në
vitin 1905, shpifjet kundër saj u bënë hi e pluhur e ajo u njoh si grua guximtare
që, duke përballuar pengesa, gati të pakapërcyeshme për shpirtin delikat të një gruaje,
pa krah e pa mbështetje, kishte vijuar të ecte në rrugën e shenjtërisë. Me bindjen
se nuk ishte kurrë vetëm: me të ishte vetë Zoti!”
Në këtë rrugë eci edhe i
Lumi Luigji Guanella, Shenjt i bamirësisë, i mirënjohur në Italinë e shekullit
XIX, gjithnjë përkrah nevojtarëve e të gjymtuarve, siç na e përshkruan, në mikrofonin
tonë, Postulatori i çështjes së shenjtërimit, don Mario Karrera:
Përgjigje:
- Figurë vërtet e madhe në jetën e tij, e jo vetëm sepse themeloi dy kongregata,
“Shërbëtorët e bamirësisë” dhe “Bijat e Shën Marisë së Provanisë”, por kryesisht sepse
qe njeri vërtetë i madh, që arriti t’i japë përgjigje, deri në kufijtë e së pamundurës,
rënkimit të njerëzimit të vuajtur, duke bërë që vuajtjet e të mjerëve, të dëgjoheshin
deri nga veshët e shurdhër të qeverive e të qeveritarëve. Prandaj mund të themi se
shenjtërimi i tij nuk është festë vetëm për bijtë e Shenjtit, por është festë e gjithë
të varfërve, të cilët i vë në qendër të vëmendjes së mbarë botës, ashtu si pati bërë
dikur don Guanela. Kështu vijon t’u përgjigjet të gjithë atyre, që kërkojnë e gjejnë
ndihmë me ndërmjetësinë e tij, me fjalët “Është Zoti ai, që bën gjithçka”.
Figurë
e ndritur edhe ajo e Shën Gjovani Maria Konfortit. Për rëndësinë e këtij shenjtërimi,
na flet atë Rino Benxoni, epror i përgjithshëm i Misionarëve saverianë, themeluar
nga Shenjti:
Përgjigje: - Përtej kremtimit, dëshirojmë që
ky kanonizim t’i shërbejë Kongregatës për të thelluar frymën e shenjtërisë e të veprimtarisë
misionare, ndërsa Kishës italiane e asaj universale, për të rizbuluar misionin e
kumtimit të Ungjillit në gjirin e mbarë popujve të botës, deri në skajet më të largëta.
Ky është impenjimi ynë themelor këtë vit, sepse themeluesi ynë, i thirrur nga Papa
për të kryesuar Kishën e Ravenës, si bari i saj, në radhë të parë ishte meshtar e
themelues i një Kongregate misionare. Askush nuk mund ta quajë veten meshtar, e aq
më pak ipeshkëv, në se nuk mendon për ungjillëzimin e mbarë botës, sepse ipeshkvi
nuk shugurohet vetëm për dioqezën e vet, por për mbarë njerëzimin. Me moton, që na
e kujtoi Gjon Pali II: “Misionari, për të qenë vërtet i tillë, duhet të jetë shenjt”.