Першае публічнае мерапрыемства кардынала Свёнтка пасля дзевяці месяцаў хваробы
Кардынал Казімір Свёнтэк,
Апостальскі Адміністратар Пінскай дыяцэзіі, правёў першае публічнае мерапрыемства
пасля дзевяці месяцаў хваробы. 15 лютага 2011 г. у Міждыяцэзіяльнай вышэйшай духоўнай
семінарыі ў Пінску ён узначаліў душпастырскую сустрэчу святароў дыяцэзіі. Духавенства
сустракала яго бурнымі апладысментамі.
19 мая 2010 г. тады 95-гадовы кардынал
зламаў шыйку сцягна, пасля чаго іерарху былі зроблены аперацыі ў Мінску і Любліне.
Затым іерарх праходзіў доўгую рэабілітацыю ў Польшчы. Толькі ў студзені 2011 г. кардынал
Свёнтэк вярнуўся ў Пінск.
Як паведамляе сайт catholic.by, падчас душпастырскай
сустрэчы іерарх падзякаваў святарам і ўсім вернікам за маральную і малітоўную падтрымку.
Ён прызнаўся, што малітвы дадавалі яму сіл.
На сённяшні дзень беларускі іерарх,
які нарадзіўся 21 кастрычніка 1914 г., разам з італьянскім кардыналам Эрзільё Таніні
(20 ліпеня 1914 г.) з’яўляецца найстарэйшым кардыналам у свеце.