Біскуп Ёзэф Клеменс,
сакратар Папскай рады па справах свецкіх, лічыць, што на Сусветныя дні моладзі ў Мадрыд
16-21 жніўня прыедзе адзін мільён чалавек. На пачатак гэтага мерапрыемства чакаецца
600 тысяч маладых людзей, а на св. Імшы з папам Бэнэдыктам XVI, якая адбудзецца ў
канцы Сусветных дзён моладзі, паводле папярэдніх ацэнак, можа быць нават мільён асобаў.
Паходзячы з нямецкага Падэборна, былы сакратар кардынала Ёзэфа Ратцынгера
ў Кангрэгацыі Веравучэння, адказвае за арганізацыю Сусветных дзён моладзі ад імя Апостальскай
Сталіцы. Падрыхтоўка да моладзевага форуму ўжо ў поўным разгары, заявіў ватыканскі
арганізатар. Ён выказаў перакананне, што вялікае ўражанне на маладых людзей з усяго
свету зробяць "глыбокія карані" веры ў Іспаніі. Касцёл краіны рыхтуе некаторыя ўласныя
акцэнты праграмы, напрыклад, тэматыку Крыжовага Шляху, набажэнства вельмі жывога ў
гэтай краіне.
Параўноўваючы Мадрыд з папярэднім каталіцкім моладзевым форумам
у Сіднэі ў 2008 годзе, біскуп Клеменс адзначыў, што тут Каталіцкі Касцёл з'яўляецца
больш прысутным. У арганізацыю ўключыліся шмат парафій, а таксама касцёльныя школы
і сацыяльныя цэнтры.