Руская Праваслаўная Царква вітае развіццё кантактаў паміж Расіяй і Ватыканам
"Руская Праваслаўная
Царква ўсяляк падтрымлівае развіццё гарманічных міждзяржаўных і міжцаркоўных адносін
на карысць людзей", - заявіў у панядзелак в.а. сакратара Сінадальнага Аддзела знешніх
царкоўных сувязяў па міжхрысціянскіх адносінах айцец Дзімітрый Сізаненка, каментуючы
будучую сустрэчу прэзідэнта Расійскай Федэрацыі Дзмітрыя Мядзведзева з папам Бэнэдыктам
XVI.
Па словах айца Дзімітрыя, "пытанні міжцаркоўнага супрацоўніцтва афіцыйныя
прадстаўнікі Маскоўскага Патрыярхата сёння вельмі паспяхова абмяркоўваюць непасрэдна
з партнёрамі ў Ватыкане".
"Усталяванне паўнавартасных дыпламатычных адносін
паміж Расійскай Федэрацыяй і Святым Пасадам надало новы імпульс развіццю канструктыўных
адносін паміж Рускай Праваслаўнай Царквой і Апостальскай Сталіцай. Папа Бэнэдыкт XVI
асаблівыя надзеі ўскладае на супрацоўніцтва з Праваслаўнай Царквой, пра гэта ён пранікліва
кажа ў кнізе-інтэрв'ю "Святло свету", - сказаў святар.
Пры гэтым прадстаўнік
Маскоўскага Патрыярхата згадаў блізкасць пазіцый, "якія паслядоўна адстойваюць Патрыярх
Кірыл і Бэнэдыкт XVI, выступаючы супраць абортаў, легалізацыі аднаполых саюзаў, эўтаназіі,
медыка-біялагічных эксперыментаў, не сумяшчальных з хрысціянскім светапоглядам".
Святар
дадаў, што "даволі часта для ажыццяўлення душпастырскай працы з расіянамі, якія апынуліся
за мяжой, прадстаўнікі Маскоўскага Патрыярхата вымушаны звяртацца да каталіцкіх біскупаў
з просьбай аб прадастаўленні памяшканняў, неабходных для стварэння парафіяльных супольнасцяў
і правядзення набажэнстваў. І мы ўдзячныя за тое, што, як правіла, такія просьбы знаходзяць
станоўчы водгук у іерархаў Каталіцкага Касцёла", - дадаў прадстаўнік Маскоўскага Патрыярхата.