Апостальская нунцыятура ў Маскве: сустрэча Мядзведзева з Бэнэдыктам XVI паслужыць
развіццю дыялогу Расіі і Ватыкана
У Апостальскай нунцыятуры
ў Расійскай Федэрацыі спадзяюцца, што маючая адбыцца сустрэча Прэзідэнта Расіі Дзмітрыя
Мядзведзева з папам Бэнэдыктам XVI паслужыць развіццю супрацоўніцтва дзвюх дзяржаў.
Монсіньёр Вісвальдас Кульбокас у інтэрв’ю агенцтву "Інтэрфакс-Рэлігія" заявіў,
што "не ведае дакладна, якія менавіта тэмы будуць закранутыя на сустрэчы Прэзідэнта
Расіі з Папам, але можна сказаць, што ў першую чаргу гэты візіт стане сімвалам прыгожых,
сяброўскіх адносінаў і супрацоўніцтва, якое ёсць і, напэўна, будзе развівацца".
Прэзідэнт
Расіі Дзмітрый Мядзведзеў 16-17 лютага наведае Італію з афіцыйным візітам, па завяршэнні
якога прыбудзе ў Ватыкан, дзе сустрэнецца з Бэнэдыктам XVI.
Па словах монсіньёра
Кульбокаса, гэтая сустрэча дасць магчымасць выказаць, "у тым ліку з боку Святога Айца",
агульныя пазіцыі Расіі і Апостальскай Сталіцы ў адносінах да абароны жыцця і маральных
каштоўнасцяў на міжнароднай арэне.
У той жа час часовы павераны Апостальскай
нунцыятуры ў Расійскай Федэрацыі лічыць, што сустрэчу не варта разглядаць у кантэксце
праваслаўна-каталіцкіх адносін, паколькі гэта будзе дзяржаўны візіт Дзмітрыя Мядзведзева,
першы пасля ўстанаўлення дыпламатычных адносін паміж Расіяй і Ватыканам. Хоць, працягнуў
ён, адносіны паміж Расійскай Федэрацыяй і Апостальскай Сталіцай "улічваюць таксама
і сяброўскія, братэрскія сувязі паміж дзвюма Цэрквамі".
Адказваючы на пытанне
аб тым, калі стане вядома імя новага Апостальскага нунцыя ў Расійскай Федэрацыі, які
зменіць на гэтай пасадзе арцыбіскупа Антоніо Менніні, прызначанага нунцыем у Вялікабрытаніі,
монсіньёр Кульбокас сказаў, што гэта адбудзецца ў бліжэйшы час, гэта значыць "у бліжэйшыя
дні або тыдні ".