Në korrik, bashkësia ndërkombëtare do të tërhiqet gradualisht nga Afganistani
(09.02.2011 RV)Milicia talebane në Afganistan mund të kërcënojë muajt e ardhshëm
kontingjentin ndërkombëtar. Deklarata është e kreut të forcave ISAF, gjeneral Dejvid
Petreus. Sipas ushtarakut të lartë, do të ishte e nevojshme që, brenda datës së fiksuar
në korrik, të fillojë “tërheqja e përgjegjshme” e trupave nga vendi, duke ua kaluar
gradualisht përgjegjësitë forcave lokale. Në mikrofonin tonë, pedagogu i studimeve
strategjike në Universitetin e Triestes, Arduino Paniça: Mendoj se Afganistani
mbetet një nga problemet kyçe në marrëdhëniet ndërmjet Perëndimit e organizatave të
tij, si NATO, dhe botës islamike. Në këtë çast, gjenerali Petreus është i shqetësuar
për ofensivën e zakonshme talebane të pranverës, prandaj paralajmëron për këtë jo
vetëm presidentin e vet, por edhe komandën e NATO-s. Muajt e ardhshëm mund të jenë
shumë të vështirë. Pavarësisht nga sukseset, si për shembull, gati njëmijë talebanët
që lanë armët vitin e kaluar, problemet themelore nuk janë zgjidhur. Por, operacionet
e tërheqjes së trupave ndërkombëtare duhet të fillojnë në verën e këtij viti. A
është e mundur të shtyhet tërheqja, për hir të ndonjë emergjence? Këtë kërkon
gjenerali, të cilit i duhet njohur merita e largimit të ushtrisë amerikane dhe të
koalicionit jashtë moçalit irakian, me mjete strategjike, si mobilizimi i trupave
ndihmëse afgane etj.. Por shifrat janë akoma modeste. Në të vërtetë, nëse fillon tërheqja
e 30 mijë ushtarëve, Petreus është i vetëdijshëm se çekuilibrimi i forcave mund t’i
favorizojë talebanët. Megjithatë, ka zona, nga ku mund të fillojë tërheqja. Gjithsesi,
problemi kryesor i Afganistanit nuk është thjesht ushtarak. Vendi ka nevojë për qeveri,
polici e siguri, të cilat duhet ta bindin popullsinë, të luftojnë korrupsionin e të
fitojnë konsensus. Jemi tepër larg nga kjo gjendje e dialogu me talebanët e moderuar
nuk ka dhënë rezultate të mëdha.