(08.02.2011 RV)Oficeri i Gardës së Republikës së Shqipërisë, zëvendëskomandant
i njësisë operative Agim Llupo u ndalua sot nga policia sepse dyshohet për vrasjen
e Ziver Veizit, një nga viktimat e 21 janarit. Lajmin e konfirmuan burimet e Ministrisë
së Brendshme të Shqipërisë. Oficerit në fjalë nuk i është bërë e ditur akoma asnjë
masë nga prokuroria, ndërkohë që gjashtë anëtarë të tjerë të njësisë operative të
Gardës janë marrë në pyetje e më pas janë liruar. Sidoqoftë nuk janë zbatuar ende
urdhër-arrestet e Prokurorisë së Përgjithshme për disa ushtarakë të lartë të Gardës
së Republikës. Sipas televizionit shqiptar News24 ekspertiza balistike ka treguar
se plumbi që vrau Ziver Veizin, manifestuesin e papunë që po rrinte përballë kryeministrisë
më 21 janar, ka dalë pikërisht nga arma e oficerit Llupo. Vdekja e Ziver Veizit është
dokumentuar edhe nga një video ku shihet qartë një gardist që qëllon me armë e menjëherë
më pas viktima që bie përtokë.