Shqipëria thërret për sqarim ambasadorin e Greqisë lidhur me deklaratat e konsullit
grek në Korçë
Ministria e Punëve të Jashtme e Shqipërisë thirri sot Ambasadorin e Greqisë në Tiranë,
Nicolas Pazios, për t'i kërkuar sqarime lidhur me deklaratat e Konsullit grek Theodhoro
Ikonomus, në ceremoninë e organizuar me rastin e 20 vjetorit të themelimit të organizatës
Omonia në qytetin e Korçës. Zyra e shtypit e MPJ-së bëri të ditur se "ministria
e Jashtme e Shqipërisë i bëri të qartë qëndrimin e saj mbi këto deklarime, duke i
quajtur ato të papranueshme". Sipas MPJ-së, deklarata të tilla nuk pasqyrojnë përmbajtjen
e marrëdhënieve shqiptaro-greke dhe cënojnë frymën e miqësisë mes dy vendeve.
Pak ditë më parë, me rastin e 20 vjetorit të themelimit të organizatës OMONIA të Korçës,
konsulli grek, Theodhoros Ikonomus, kërkoi që "grekët e Korçës të mos kenë frikë të
regjistrohen si grekë", duke theksuar se vllehët janë grekë. Intelektualë dhe qytetarë
korçarë dënojnë deklaratat e konsullit grek. (nga ATSH-ja)